Vokzaldarda tyıym salynǵan zat tabylǵan 78 adam qylmystyq jaýapkershilikke tartyldy

ASTANA. QazAqparat - Temirjol vokzaldaryna tyıym salynǵan zattardy alyp júrgen 80-ge jýyq adamnyń ústinen qylmystyq is qozǵaldy, dep habarlaıdy QazAqparat «Qazaqstan temir joly» UK» AQ baspasóz qyzmetine silteme jasap.

Jyl basynan beri temirjol vokzaldaryndaǵy tekseris nátıjelerinde 15 myńnan astam tyıym salynǵan zattar, onyń ishinde 90 sýyq qarý, 80 atys qarýynyń oq-dárisi anyqtaldy.

«Vokzaldardaǵy eki jarym mıllıonǵa jýyq adamǵa jáne olardyń qol júkterine ishinara tekserister júrgizildi», - deıdi «Áskerılendirilgen temirjol kúzeti» AQ (ÁTJK) Tekserýdi uıymdastyrý jónindegi bas menedjeri Ádilbek Júbekov.

Onyń aıtýynsha, 141 jolaýshydan asa qaýipti zattar men quraldar tabyldy. Onyń barlyǵy kóliktegi ishki ister organyna tapsyrylsa, 78-ine qatysty qylmystyq is qozǵaldy.

Bul tekseristerdi Áskerılendirilgen temirjol kúzeti qyzmetkerleri 2017 jyly maýsymnan bastap barlyq vokzaldarǵa ornatylǵan arnaıy qondyrǵylar arqyly júrgizýde. Tekserý quraldary televızııalyq rentgen apparaty, arkaly jáne qol júgine arnalǵan metall detektory, jarylǵysh zattardy anyqtaıtyn detektor iske qosylǵan.