Vladıslav Chelah ótinishi Bas prokýratýraǵa tústi
«Vladıslav Chelah ótinishi Bas prokýratýraǵa kelip tústi. Qazirgi ýaqytta tıisti qyzmet qylmystyq isti áskerı sottan surady. Ol túskennen keıin qosymsha zerdeleımiz. Óıtkeni bul iske 10 jyl ýaqyt ótti. Qajettilik bolsa, onda ol tergeledi. Al odan keıin ne bolary anyqtalady», - dedi Tımýr Táshimbaev.
Keshe QR Bas prokýrorynyń orynbasary Jandos Ómirálıev Vladıslav Chelahtyń Prezıdentke jazǵan hatyna qatysty pikir bildirdi.
Eske sala ketsek, 2012 jyly mamyrdyń 27-sinen 28-ine qaraǵan túni Almaty oblysynyń «Arqankergen» shekara beketinde 14 shekarashy jáne bir qoryqshy qaza tapty.
Aman qalǵan on besinshi sarbaz Vladıslav Chelah shekara beketinen 20 shaqyrym jerde ornalasqan qystaýdan tabyldy.
Tergeý jumysy barysynda V. Chelah basty kúdikti retinde qarastyrylyp, qamaýǵa alyndy.
Oǵan tergeýshi toǵyz bap boıynsha aıyp taqty, sonyń ishinde «Eki nemese odan da kóp adamdy óltirý», «Jeke zattardy urlaý», «Qupııa qujattardy urlaý», «Qarýdy urlaý», «Qarýdy zańsyz ustaý», «Áskerı múlikti búldirý», «Áskerı qyzmetten qashý», jáne «Bóten bireýdiń baspanasyna zańsyz kirý» baptary bar.
Sońynda V.Chelah qyzmettesterin óltirgenin moıyndap, ómir boıyna bas bostandyǵynan aıryldy jáne Qostanaı oblysyndaǵy «Qara búrkit» túrmesine jiberildi.
2019 jyly V. Chelah bas bostandyǵynan aıyrý jazasyn alyp tastaýdy, quqyǵy buzylǵany úshin 30 mln teńge moraldyq shyǵyn óteýdi jáne isti qaıta qaraýdy suraǵan edi.
QR Joǵarǵy soty bul shaǵymdy qanaǵattandyrmady.