Vladımır Pýtın ShYU elderi Syrtqy ister mınıstrlerimen kezdesti

MÁSKEÝ. QazAqparat – Shanhaı yntymaqtastyǵy uıymy elderi Syrtqy ister mınıstrleri Keńesiniń otyrysy qarsańynda Reseı Federatsııasynyń Prezıdenti Vladımır Pýtın beınekonferentsııa rejıminde Uıymǵa múshe memleketterdiń syrtqy saıası vedomstvolarynyń basshylarymen kezdesti, dep habarlaıdy QazAqparat.

RF Prezıdenti Reseı tóraǵalyǵy Shanhaı yntymaqtastyq uıymy qarqyndy báseńdetpeı jáne tıimdi jumys isteýi úshin qajettiniń barlyǵyn jasaýǵa tyrysqanyn atap ótti.

«ShYU Eýrazııalyq aımaqta beıbitshilik pen qaýipsizdikti, turaqty damýdy qamtamasyz etýde mańyzdy ról atqarady. Teń quqylyq jáne múddelerdi ózara esepke alý qaǵıdattarynda áreket ete otyryp, biz álemdik kún tártibindegi ózekti máselelerdiń sheshimderin birlesip izdeýge, BUU jáne basqa da halyqaralyq formattardy qosa tyǵyz syrtqy saıası úılestirýdi júzege asyrýǵa umtylamyz», - dep keltiredi QR Syrtqy ister mınıstrligi V.Pýtınniń sózin.

Sondaı-aq, ShYU jańa, ózekti syn-qaterlerge jedel den qoıý qabiletin is júzinde kórsetip otyrǵany atap ótildi. ShYU elderi koronavırýstyń taralýynyń saıası, saýda-ekonomıkalyq, áleýmettik saldaryn eńserýge kúsh salýda.

RF Basshysy aldaǵy otyrysta qatysýshylarǵa jemisti jumys tilep, Máskeý alańynda qabyldanǵan sheshimder Shanhaı yntymaqtastyq uıymynyń keń keńistiginde áriptestik pen yntymaqtastyqty nyǵaıtýǵa yqpal etetinine senim bildirdi.