Vladımır Pýtın: Nursultan Nazarbaev eýrazııalyq ıntegratsııaǵa súbeli úles qosty

MÁSKEÝ. QazAqparat - Reseı Federatsııasynyń Prezıdenti Vladımır Pýtın úkimet múshelerimen kezdesýde Qazaqstan Respýblıkasynyń Tuńǵysh Prezıdenti Nursultan Nazarbaevtyń eýrazııalyq ıntegratsııaǵa qosqan súbeli úlesin atap kórsetip, birge atqarǵan tabysty eńbegi úshin alǵys bildirdi, dep habarlaıdy «QazAqparat» HAA-nyń menshikti tilshisi.

«Bizge eń jaqyn kórshi elde qandaı saıası oqıǵalar bolyp jatqanyn kórip otyrmyz. Olar saıası basshylyqtyń almasýyna baılanysty. Sabaqtastyqtyń qamtamasyz etiletinine úmit artamyz. Biraq, Nursultan Ábishuly Nazarbaevtyń joǵarǵy memlekettik laýazymyn tapsyrýyna baılanysty, oǵan birge atqarǵan eńbegi úshin kóp rahmet aıtyp, densaýlyq, sáttilik tileýge barsha negizimiz bar.

Ol elderimiz arasyndaǵy ozat ıntegratsııanyń bastamashylarynyń biri, EAEO avtory deýge bolady. Bul joba onyń tikeleı qoldaýynyń, osy iske atsalysqanynyń arqasynda tabysty damyp keledi. Óz tarapymyzdan osy protsesterdi jalǵastyrý úshin barymyzdy salamyz», - dedi Reseı basshysy RF úkimet múshelerimen kezdesýde.

Avtor: Medet Ahmetov