Vladımır Pýtın Qasym-Jomart Toqaevti QR Táýelsizdigi kúnimen quttyqtady

NUR-SULTAN. QazAqparat – Reseı Federatsııasynyń basshysy Vladımır Pýtın Qazaqstan Respýblıkasynyń Prezıdenti Qasym-Jomart Toqaevqa ulttyq meıram – Táýelsizdik kúnimen quttyqtaý jedelhatyn joldady, dep habarlaıdy Reseı Prezıdentiniń saıty.

Reseı memleket basshysy Qazaqstannyń ekonomıkalyq, áleýmettik, ǵylymı-tehnıkalyq jáne basqa salalardaǵy jetistikterine joǵary baǵasyn berip, sondaı-aq eldiń álemdik arenadaǵy joǵary abyroıyn atap ótti.

«Bizdiń memleketterimizdiń arasyndaǵy qarym-qatynas strategııalyq seriktestik rýhynda qarqyndy damyp keledi. Túrli baǵyttardaǵy ekijaqty yntymaqtastyq, sondaı-aq EýrAzEO, UQShU, TMD, ShYU, BUU sııaqty qurylymdar aıasyndaǵy ózara yqpaldastyq jemisin berip jatyr», - dep atap ótti quttyqtaýynda Reseı prezıdenti.

V.Pýtın eki el halyqtarynyń ıgiligi jáne eýrazııalyq qurlyqtaǵy turaqtylyq pen qaýipsizdikti qamtamasyz etý múddesi úshin qazaqstandyq-reseılik konstrýktıvti baılanysy odan ári nyǵaıa túsetinine senimin bildirdi.