Vladımır Bojko aýyl mektepteriniń jaı-kúıin synǵa aldy
«Aýyldarda halqymyzdyń 42% turyp jatyr. Parlament Májilisindegi QHA depýtattar toby barlyq turǵyndardyń ómiri men bilim berý sapasyn, ekonomıkalyq ál-aýqatty kórsetýdiń elimizdegi ulttyq qaýipsizdik pen tynyshtyqtyń kepili ekenin túsinedi. Qazir elimizdegi 7014 mekteptiń 5285-i aýyldarda ornalasqan. Onda respýblıka oqýshylarynyń 46% nemese 1 mln 423 myń 988 bala bilim alýda», - dedi Vladımır Bojko QR Tuńǵysh Prezıdenti – Elbasy kitaphanasynda «Elbasy jáne halqy» kitabynyń tanystyrylymynda.
EYDU derekterine sáıkes, sapaly bilim berý júıesi men mektep ǵımarattarynyń jaı-kúıi balalardyń úlgerimine tikeleı yqpal etedi.
«1283 mektep beıimdelgen ǵımarattarda ornalasqan, 696 (13%) mektepte esh jaǵdaı jasalmaǵan. 1644 (31%) mektep sýdy syrttan tasıdy, 2357 (45%) mekteptiń dárethanasy syrtta ornalasqan. Mektepterdiń 53% pesh jaǵady. Meniń oıymsha, biz aýyl mektepterin jańa kabınettermen jasaqtaı almaı otyrmyz, kompıýterlerdiń 33% jańartý qajet», - dedi depýtat.
Sonymen birge, depýtat aýyldaǵy sportty damytý qajettigin erekshe atap ótti.
«Aýyl balalaryna fýtbol alańdary, basseınder men oıyn zaldary ashylady, kúte turyńdar dep aıtýǵa bolmaıdy. Qazir ákimdikterdiń bizdegi fýtbol klýbtarynda oınap júrgen «afrıkalyq balalarǵa» qandaı qarjy jumsap jatqany jasyryn emes. QHA depýtattary men Parlamenttiń ózge fraktsııalary birneshe ret Mádenıet jáne sport mınıstrligin buqaralyq balalar sportyna, ásirese aýyldaǵy sportqa kóńil bólýge shaqyrdyq. Alys elderden qymbat baǵaǵa satyp alǵansha, ózimizdiń sportshylardy tárbıeleıik», - dedi V. Bojko.