Vızasyz keletin sheteldikterdiń Qazaqstanda bolý merzimi uzarýy múmkin

ASTANA. QazAqparat – Ózara vızalyq talaptardan bosatylǵan memleketterden keletin sheteldikterdiń Qazaqstanda bolý merzimi uzartylady. Іshki ister mınıstrliginiń Kóshi-qon qyzmeti komıteti osyndaı usynys kórsetilgen qaýlyny jarııalady, dep habarlaıdy QazAqparat tilshisi.

«Qazaqstan Respýblıkasyna vıza alýdy talap etpeıtin tártippen kóship kelýshilerdiń Qazaqstanda bolýyna memlekettik shekarany kesip ótken kúnnen bastap 180 kúndik jıyntyqta 90 kún ótkenshe ruqsat etiledi. Bul QR memlekettik shekarasyn kesip ótken kúnnen bastap kúntizbelik 14 kún ótken soń aıaqtalatyn Iran, Qytaı Halyq Respýblıkasy jáne Úndistannyń azamattaryna áser etpeıdi», - dep jazylǵan qujatta.

Aıta keteıik, burynǵy talapqa sáıkes, Qazaqstan aýmaǵyna vızasyz keletin azamattardyń elimizde 30 kún turýyna ruqsat etiletin.

«Kóship kelýshilerdiń ruqsat etilgen bolý merzimin esepteýdi QR Ulttyq qaýipsizdik komıteti Shekara qyzmetiniń laýazymdy adamy ótkizý pýnktinde 180 kún buryn naqty kirgen kúnnen bastap sanap shyǵarý jolymen júzege asyrady. Eger kelý kezinde kóship kelýshiniń oǵan ruqsat etilgen bolý merziminen asyp ketkeni anyqtalǵan jaǵdaıda, «Halyqtyń kóshi-qony týraly» zańyndaǵy tártippen kelýden bas tartý týraly sheshim qabyldanady», - dep kórsetilgen ózgeris engizilgeli otyrǵan qaýlyda.

Degenmen, bul normalar Qazaqstanda ýaqytsha turýǵa ruqsat alǵan sheteldikterge qoldanylmaıdy.

Sonymen qosa, burynǵy redaktsııada elge zańsyz kóship kelýshilerdi Qazaqstan aýmaǵynan shyǵarý shyǵyndaryn sol adamdy elge shaqyrǵan ne onyń eńbegin paıdalanǵan jeke nemese zańdy tulǵa óteıtin. Usynylyp otyrǵan qaýlyda bul norma alynyp tastalǵan.