Vızasyz rejım: Jetisý oblysyndaǵy shekara beketteri qyzmet kórsetýge daıyn ba?
Vızasyz rejımniń kúshine enýi shekaradaǵy baqylaý beketteri men aýmaqtaǵy basqa da qyzmetterdiń jumysyna qosymsha salmaq túsirgeli tur. Ásirese, kólik qozǵalysy, jolaýshylar tasymaly, qonaq úı men tamaqtaný oryndarynyń qyzmetine qatysty daıyndyq jumystaryn shıratý kún tártibinde. Bul jumys Jetisý oblysynyń Panfılov aýdanynda da júrip jatyr. Aýdan aýmaǵynda birneshe shekaralyq beket bar. Onyń ishinde «Nur joly» ótkizý beketiniń jumysy qyzaıyn dep tur. Eki el azamattary negizinen osy beket arqyly ótip, qatynaıdy.
Osyǵan oraı Panfılov aýdany ákimdiginiń janyndaǵy kezekten tys aýdandyq jedel shtab otyrysy ótti. Otyrysta Qytaı elimen vızasyz rejımniń kúshine enýine baılanysty shekaralyq aýmaqta týyndaıtyn máseleler talqylandy.
Jıynǵa prokýratýra, ulttyq qaýipsizdik komıteti, shekara jáne keden qyzmeti men quqyq qorǵaý organdarynyń basshylary, sondaı-aq ózge de mekeme basshylary qatysty.
Otyrysta aýdan ákimi Marat Saǵymbek «Nur joly» ótkizý beketindegi jolaýshylardy qabyldaý bólimi ondaǵy kórsetiletin qyzmetter túri men avtobýs tasymaly syndy máselelerdi jetkizip, birqatar mekeme basshylaryna kemshilikterdi joıý týraly tapsyrma berdi.
«Vızasyz rejım elimizdegi týrızmdi damytýǵa serpin beredi. Biz týrıstik aımaq retinde sapaly qyzmet kórsetýimiz qajet. Bul bizdiń aýdanymyzdyń ekonomıkasy úshin aıtarlyqtaı paıdaly. Bolashaqta túrli qyzmet kórsetý oryndaryn ashyp, týrıstik baǵytta jumystar júrgizbekpiz. Qazirdiń ózinde oǵan qatysty josparlarymyz bar. Bastysy shekara mańyn tártipke keltirip, bárin bir jolǵa qoıyp, zańdy túrde jumys júrgizý mindeti tur», - deıdi Panfılov aýdanynyń ákimi Marat Saǵymbek.