Vıtse-premer Serik Jumanǵarınge Ózbekstannyń «Dýstlık» ordeni tabystaldy

<p>ASTANA. KAZINFORM - Qazaqstan Respýblıkasy Premer-Mınıstriniń orynbasary Serik Jumanǵarın Ózbekstan Respýblıkasynyń Qazaqstandaǵy Tótenshe jáne Ókiletti Elshisi Bahtıer Ibragımovpen kezdesti, dep habarlaıdy Úkimettiń baspasóz qyzmeti.</p>

Taraptar Qazaqstan men Ózbekstannyń agrarlyq saladaǵy yntymaqtastyǵynyń aldaǵy jobalaryn talqylap, bıdaı, kúrish jáne basqa da aýyl sharýashylyǵy daqyldaryn tereń óńdeıtin birlesken óndirister qurýǵa basa nazar aýdardy. Kezdesýge qatysýshylar eki el arasyndaǵy saýda-ekonomıkalyq yntymaqtastyqtyń joǵary deńgeıi men belsendi qarqynyn, sondaı-aq bıznes taraptarynyń túrli baǵyttaǵy birlesken áreketterin joǵary baǵalady.

Ózbekstan basshysynyń atynan Bahtıer Ibragımov Serik Jumanǵarınge «Dýstlık» ordenin tabystady. 2024 jyldyń tamyz aıynda Ózbekstan Prezıdenti Shavkat Mırzıeev Qazaqstannyń bir top memleket jáne qoǵam qaıratkerlerin «Dýstlık» ordenimen marapattaý týraly jarlyqqa qol qoıyp, olardyń Ózbekstan Respýblıkasy men Qazaqstan Respýblıkasy arasyndaǵy ózara qurmet, senim jáne strategııalyq seriktestik qatynastaryn jańa deńgeıge kóterýdegi jeke úlesterin atap ótkeni belgili.