Nurlan Baıbazarov: Jańa Salyq kodeksi bıznesti teńgerimdeýdi qamtamasyz etedi

<p>ASTANA. KAZINFORM &ndash; Premer-Mınıstrdiń orynbasary &ndash; ulttyq ekonomıka mınıstri Nurlan Baıbazarov bıýdjet kiristeri men ekonomıkadaǵy ósimdi yntalandyrý arasyndaǵy teńgerimge qol jetkizýge baǵyttalǵan Salyq kodeksindegi josparlanǵan ózgerister týraly aıtty. Bul týraly ol Primeminister.kz-ke bergen eksklıýzıvti suhbatynda aıtty.</p>

Qujattyń negizgi mindeti — tepe-teńdik prıntsıpi bolyp sanalady. Salyq kodeksi, bir jaǵynan, áleýmettik salanyń jumys isteýi jáne basqa da memlekettik mindetterdi oryndaý úshin bıýdjettiń jetkilikti kirisin qamtamasyz etýge tıis. Ekinshi jaǵynan – bıznes pen ınvestıtsııalardy yntalandyrý, ekonomıkalyq ósimdi jáne óndiristi ulǵaıtýdy qamtamasyz etý. 

«Negizgi baǵyttardyń biri yntalandyrý jáne qoldaý sharalaryn, sondaı-aq protsesterdi tolyq tsıfrlandyrýdy qamtıtyn, servıstik modelge kóshýmen salyqtyq ákimshilendirýdi jetildirý bolady. Biz bıznesti ashqannan bastap súıemeldeý úshin jazalaý sharalarynan konsýltatıvti jáne qoldaý sharalaryna kóshýimiz kerek», — dep atap ótti vıtse-premer.

Sondaı-aq ol 1,3 trln teńgeden astam somaǵa salyq jeńildikterin qysqartý jáne salyqtar men alymdardy ońtaılandyrýdy usyný jospary týraly habarlady. 

«Memleket basshysy salyqtyq jeńildikterdiń kem degende 20%-ǵa qysqartý mindetin qoıdy. Biz jaǵdaıdy jalpy baǵalaý boıynsha jumys júrgizdik jáne endi naqty sharalardy usynamyz», — dep túsindirdi Nurlan Baıbazarov.

Ekonomıkany, ınvestıtsııalardy jáne bıznesti yntalandyrý úshin Salyq kodeksinde negizgi ınvestıtsııalyq preferentsııalar saqtalady, sondaı-aq sheteldik jáne ishki ınvestıtsııalardy tartýdyń jańa sharalary usynylady. Taý-ken ónerkásibin odan ári damytý áleýetin túsiný úshin geologııalyq barlaý belsendi túrde yntalandyrylatyn bolady. Birinshi kezekte, shaǵyn jáne orta bızneske qatysty salyq bazasyn keńeıtý jáne kóleńkeli ekonomıkany tómendetý qajet. Arnaıy salyq rejımderin ózin-ózi jumyspen qamtyǵandar, shaǵyn bıznes jáne sharýalar úshin jeńildetý usynylady. Bıýdjet kiristerin arttyrý úshin korporatıvtik tabys salyǵy boıynsha saralanǵan tásil usynyldy.

«Biz joǵary marjınaldyq qarjy operatsııalary men oıyn bıznesinde KTS arttyrýdy, biraq naqty sektor úshin qoldanystaǵy mólsherlemeni saqtaýdy usynamyz. Óńdeý ónerkásibindegi joǵary qaıta óńdeýge ınvestıtsııalar salý kezinde KTS eki esege – 10%-ǵa deıin qysqartylady», — dedi vıtse-premer.

Sonymen qatar Nurlan Baıbazarov QQS qaıtarý protsesin avtomattandyrý jospary jáne zeınetaqy tabysyna 10% mólsherinde jeke tabys salyǵyn salýdy alyp tastaý jónindegi usynys týraly aıtyp berdi. Biraq sońǵy sheshimderdi Parlament pen Memleket basshysy qabyldaıdy. Bul sharalar Qazaqstanda ekonomıkalyq ósimge jáne bıznestiń damýyna yqpal etetin neǵurlym qolaıly salyqtyq ortany qurýǵa baǵyttalǵan.

Eske sala keteıik, buǵan deıin jańa Salyq kodeksiniń jobasy jarııalanǵanyn jazǵan bolatynbyz.