Vıtse-premer dollar baǵamy jaıly: Dúrbeleńge erýdiń jóni joq

<p>ASTANA. KAZINFORM &ndash; Úkimette valıýta naryǵyn turaqtandyratyn quraldar bar. Bul týraly Úkimette ótip jatqan brıfıngte Premer-Mınıstrdiń orynbasary &ndash; Ulttyq ekonomıka mınıstri Nurlan Baıbazarov aıtty.</p>

— Memleket azamattardy áleýmettik qamtamasyz etedi. Kelesi jylǵa arnalǵan bıýdjet ındeksteldi jáne barlyq áleýmettik shyǵys artty. Valıýtany satyp alý, almaý ár azamattyń tańdaýy. Biraq, dál qazirgi jaǵdaıda dúrbeleńge erýdiń jóni joq dep oılaımyn. Biz mundaı jaǵdaıdy 2022 jyly bastan keshirdik. Sol ýaqytta adamdar bir dollardy qaıtalama naryqtan 600 teńgeden satyp aldy da túptep kelgende teris qarjylyq balansqa tap boldy, — dedi Nurlan Baıbazarov BAQ ókilderiniń saýalyna oraı. 

Vıtse-premerdiń atap ótýinshe, Úkimette valıýta naryǵyn turaqtandyratyn quraldar bar jáne onyń jalpy ekonomıkaǵa, azamattardyń áleýmettik qorǵalýyna teris yqpalyn barynsha tómendetý úshin qajetti sharanyń bári qoldanylady. Sonymen qatar ol respýblıkalyq bıýdjette 1 dollardyń ortasha baǵamy 470 teńge dep belgilengenin eske saldy.

— Ázirshe, atalǵan baǵamdy qaıta qarastyraıyq dep otyrǵanymyz joq. Valıýta baǵamynyń dınamıkasyn qaraımyz. Menińshe, birinshi toqsanda qaı baǵytta júrýmiz qajettigi aıqyndalyp qalar, — dedi ol.