Vıtse-mınıstr lýdomanııa zańy týraly: Lobbı bar, bizge de qysym jasaǵandar boldy

<p>ASTANA. KAZINFORM &ndash; Týrızm jáne sport vıtse-mınıstri Mıras Tólebaev Májilis depýtaty Elnur Beısenbaevtyń lýdomanııa týraly zańdy Úkimettiń qoldan keshiktirip otyrǵany týraly synyna jaýap berdi.</p>

«Depýtat Elnur Sabyrjanulynyń maǵan qoıǵan suraǵyna kelsem, úlken zań jobasy ázirlendi. Oǵan Týrızm jáne sport mınıstrligi de atsalysty. 1,5 jyl emes. Ol zań jobasyn jasaý negizi 2022 jyldyń jeltoqsan aıynda bastalǵan. Sanasańyz, 1,5 jyl bolmaıdy. Ekinshiden, zań jobasy týraly bastamany kótergen Parlamenttiń VII shaqyrylymy edi. Odan keıin saılaý bolyp, VIII shaqyrylym keldi. Jumys osylaısha 3-4 aıǵa toqtap qaldy», — deıdi vıtse-mınıstr.

Ol sondaı-aq zań jobasyn ilgeriletýge qarsy áreketter bar ekenin rastady.

«Lobbızm elementteri bar ekenine kelisemin. Óıtkeni zań jobasyna Úkimet tarapynan tıisti qorytyndy berý satysynda, tıisti rásimderdi ótý kezinde neshe túrli birlesken uıymdar, qoǵamdyq birlestikter, ulttyq kásipkerler palatasynyń janyndaǵy akkredıttelgen uıymdar tarapynan qarsylyq, qysym boldy. Ol jaǵynan kelisemiz», — dedi Mıras Tólebaev. 

Eske salsaq, Májilistiń áleýmettik-mádenı damý komıteti ótkizgen sybaılas jemqorlyq taqyrybyndaǵy otyrysynda depýtat Elnur Beısenbaev Úkimet lýdomanııa týraly zańdy qoldan keshiktirip otyrǵanyn aıtqan bolatyn.