Vıtse-mınıstr BQO-da qutqarýshynyń qalaı pyshaqtalǵanyn aıtty

<p>ASTANA. KAZINFORM &ndash; Tótenshe jaǵdaılar vıtse-mınıstri Baýyrjan Syzdyqov Batys Qazaqstan oblysynda qutqarýshynyń pyshaqtalýyna baılanysty óz nusqasyn aıtty.</p>

«Ókinishke qaraı, halyqtyń ishinde kómekke kelgen qutqarýshylardyń arqasyna pyshaq qadaıtyn adamdar bar bolyp shyqty. Bul qalaı boldy? Batys Qazaqstan oblysynda bizdiń eki qutqarýshy ózen jaǵasyna baryp, adamdardy jaǵanyń ekinshi jaǵyna qaıyqpen baǵyttap turǵan. Olarǵa eki jergilikti turǵyn jaqyndap, ilik izdeı bastaǵan. Áýpirimdep ymyraǵa kelgennen keıin, álgi ekeý ketip bara jatyp qutqarýshylardyń bul jaqta qansha ýaqyt bolatyndaryn suraıdy. «Biz bul jerde aptanyń jeti kúninde, táýliktiń 24 saǵatynda osy jerde bolamyz», - dep jaýap beredi. Keshke álgi ekeý iship alyp, mas kúıinde qaıta keledi de tóbeles bastap ketedi. Osy kezde bireýi pyshaq suǵyp alady», - dedi ol.

Baýyrjan Syzdyqov zardap shekken qutqarýshynyń jaǵdaıyna da toqtaldy.

«Qudaıǵa shúkir, qazir qyzmetkerimiz aýrýhanada jatyr. Jaǵdaıy turaqty. Dárigerler jaqsy bolyp ketedi dep otyr. Zań buzǵandar ustaldy. Olar kinálaryn moıyndady jáne aýrýhanada jatyr», - dedi vıtse-mınıstr.

Eske salsaq, Batys Qazaqstan oblysy Kaztalov aýdanynda sý tasqynynan zardap shekken turǵyndarǵa kómektesýge barǵan qutqarýshy pyshaq jaraqatyn aldy.

Polıtseıler tótenshe jaǵdaılar bóliminiń qyzmetkerin pyshaqpen jaraqattaǵan Kaztalov aýdany Jalpaqtal aýylynyń turǵynyn ustady.

Jaraqattanǵan qutqarýshy azamattyq qorǵaý organynda 2021 jyldan beri, al Jalpaqtal aýylyndaǵy №17 órt sóndirý beketiniń bólimshe komandıri laýazymynda 2023 jyldan beri qyzmet atqaryp keledi.