Vırýstyq gepatıtti emdeýdiń jańa tásilderi bekitildi

ASTANA. QazAqparat - Densaýlyq saqtaý mınıstrligi «Qazaqstan Respýblıkasynda gastroenterologııalyq jáne gepatologııalyq kómek kórsetýdi uıymdastyrý standartyn bekitý týraly» standartty ázirlep, bekitti, dep habarlaıdy QazAqparat.

Standartta sozylmaly vırýstyq gepatıttermen (SVG) jáne asqazan-ishek joldarynyń basqa da aýrýlarymen aýyratyn patsıentterge medıtsınalyq kómek kórsetý tártibi kózdelgenin aıta ketken jón.

Sonymen qatar, qujatta QR turǵyndaryna gastroenterologııalyq jáne gepatologııalyq kómek kórsetý deńgeıleri (medıtsınalyq-sanıtarııalyq alǵashqy kómek kórsetý uıymdary, gastroenterologtyń mamandandyrylǵan kabıneti, gepatologııalyq ortalyq, kóp beıindi aýrýhanalar qurylymyndaǵy gastroenterologııalyq bólimsheler/tósekter) qurylymdalǵan.

SVG-ǵa zerttep-qaraý júrgizýdiń algorıtmi men merzimderi (PTR, fıbroskan, gastroenterolog / ınfektsıonıst dárigerdiń konsýltatsııasy jáne t.b.) egjeı-tegjeıli jazylǵan.

SGV bar patsıentterdi vırýsqa qarsy terapııamen (VQT) qamtýdy jaqsartý maqsatynda beıindi mamannyń (gastroenterolog nemese ınfektsıonıst) MSAK deńgeıindegi konsýltatsııalyq qorytyndysy negizinde gepatologııalyq ortalyqqa barmaı-aq «S» (F0-F2) vırýstyq gepatıti fıbrozynyń jeńil satylarynda vırýsqa qarsy terapııany taǵaıyndaý shemasy jeńildetildi.

Sheteldik tájirıbeni eskere otyryp, «bir tereze» qaǵıdaty boıynsha olarda ilespe SVG anyqtalǵan kezde AITV ınfektsııasymen ómir súretin adamdardyń JITS ortalyqtarynda vırýsqa qarsy terapııa alý múmkindigi týraly norma engizildi. Olar sondaı-aq turǵylyqty jeri boıynsha MSAK uıymynda vırýsqa qarsy terapııa ala alady.