Vırýsty ınfektsııanyń birneshe túri anyqtaldy - Aıjan Esmaǵambetova

ASTANA. QazAqparat – Saılaý kúninde komıssııa músheleri betperdeni 3 saǵat saıyn almastyrýy kerek. Bul týraly búgin QR Densaýlyq saqtaý vıtse-mınıstri – Bas memlekettik sanıtarlyq dáriger Aıjan Esmaǵambetova aıtty, dep habarlaıdy QazAqparat tilshisi.

«Tumaýdan basqa, elimizde ózge de vırýsty ınfektsııalar anyqtaldy. Olar: rınovırýsty, resvırýsty, adenovırýsty, bokavırýsty, metapnevmovırýsty jáne paragrıpp. Respýblıkamyzda jiti respıratorlyq vırýsty ınfektsııa jáne tumaýmen syrqattanýdyń artýyn, koronavırýs ınfektsııasy boıynsha jaǵdaıdyń turaqty ekendigin eskere otyryp, saılaýdy ótkizý kezinde saılaý komıssııasy músheleri betperde tártibin saqtaýy, bir ret qoldanylatyn betperdeni ár úsh saǵat saıyn almastyrýy qajet», - dedi vıtse-mınıstr búgin QR Ortalyq saılaý komıssııasynyń otyrysynda.

Onyń atap ótýinshe, halyqtyń kóp jınalýyn boldyrmaý úshin barynsha keń bólmelerdi paıdalaný qajet.

«Bólmelerdi jeldetý júıesi úzilsiz jumys isteýi kerek. Al jasandy jeldetý júıesi bolmaǵan jaǵdaıda is-sharalardy ótkizý aldynda bólme aýasyn tazartý qajet», - dedi Aıjan Esmaǵambetova.