Vılnıýste lıtva tiline aýdarylǵan «Qazaqstan tarıhy» kitabynyń tusaýkeseri ótti
Qazaqstan Táýelsizdiginiń 30 jyldyǵyna arnalǵan is-sharaǵa Seımniń depýtattary, Syrtqy ister mınıstrliginiń, iskerlik jáne akademııalyq orta ókilderi, Qazaqstannyń qurmetti konsýldary, mádenıet qaıratkerleri men qazaqstandyq stýdentter qatysty.
Kitaptan lıtvalyq oqyrman qazaq halqynyń ejelgi dáýirden búgingi kúnge deıingi tarıhy, sondaı-aq bostandyq pen táýelsizdik úshin kúresi týraly bile alady.
QR Elshisi Vıktor Temirbaev bul is-shara Qazaqstan-Lıtva mádenı qatynastaryndaǵy mańyzdy oqıǵa ekenin atap ótti.
Dıplomat qonaqtardy Qazaqstannyń Tuńǵysh Prezıdenti – Elbasy Nursultan Nazarbaevtyń arqasynda qol jetkizilgen elimizdiń úsh onjyldyqtaǵy tabystarymen tanystyryp, qazirgi tańda bul baǵytty Memleket basshysy Qasym-Jomart Toqaev júrgizip kele jatqanyn atap ótti.
Kitap avtory, QR Bilim jáne ǵylym mınıstrligi Memleket tarıhy ınstıtýtynyń dırektory Erkin Ábil óziniń beıneúndeýinde bul basylymnyń negizgi maqsaty - oqyrmandy Uly dala órkenıetiniń tarıhymen tanystyrý ekenin atap ótti. Onyń aıtýynsha, sońǵy jyldary respýblıka basshylyǵy Qazaqstan tarıhynyń aspektilerin ǵylymı turǵydan zertteýge kóp kóńil bólip keledi.
Qazaqstan elshiligi «Jara» baspa úıine jáne onyń basshysyna kitapty Lıtva tiline aýdarýǵa jáne ony basyp shyǵarýǵa kómek kórsetkeni úshin alǵys bildirdi. Kitap Lıtvanyń jetekshi ýnıversıtetteriniń kitaphana qorlaryna jáne Vılnıýs, Klaıpeda jáne Kaýnas ortalyq qalalyq kitaphanalaryna jiberiledi.
Martınas Majvıdas atyndaǵy Lıtva ulttyq kitaphanasy - Lıtvadaǵy eń iri ǵylymı kitaphana, Lıtva jáne sheteldik qujattardyń memlekettik qoımasy. Parlamenttik kitaphana, Eýropalyq odaqtyń, Dúnıejúzilik banktiń, MAGATE-niń jáne basqa da birqatar halyqaralyq uıymdardyń depozıttik kitaphanasy qyzmetin atqarady.