Vıktorııa Tregýbova: Boıymda orys qany týlasa da, janym – qazaq
«Men Reseıdiń Ýlıanovsk oblysynda dúnıege keldim. Anam – Jambyl oblysy Moıynqum aýdanynyń týmasy. Mektep bitirgen soń, ilim-bilim izdep, Reseıge attandy. Sol jaqta ákemdi jolyqtyryp, ekeýi shańyraq kóteredi. Arada bes-alty jyl ótkende sheshem ákemdi tórkinine tanystyrmaq bolyp, Qazaqstanǵa keledi. Ákeme qazaq eliniń qonaqjaılyǵy unaǵany sonshalyq, biz Reseıge qaıtyp oralmadyq. Men kishkentaı Ulanbel aýylynda ósip, sol jerde qazaq tilinde bilim aldym. Al, aǵam memlekettik tildi menen jaqsy biledi. Bizge úıdegilerden tys syrlasý qajet bolsa, biz qazaq tilinde sóılesýge kóshemiz. Osyndaı sátte olar bizge «naǵyz qazaqtar» dep ázildeıdi. Meniń boıymda orys qany týlap jatsa da, meniń janym – qazaq. Sondyqtan men árqashan jáne barlyq jerde ózimdi «orystyń qazaq qyzy» dep tanystyramyn», - dedi ol Elbasy Nursultan Nazarbaevtyń tóraǵalyǵymen ótken Qazaqstan halqy Assambleıasy keńesiniń otyrysynda.
Sonymen qatar, ol QR Tuńǵysh Prezıdentiniń bastamasymen qolǵa alynǵan «Rýhanı jańǵyrý» baǵdarlamasy aıasynda ulttyq qundylyqtarymyz túgendelip, qaıta jańǵyrǵanyn basa aıtty.
«Siz árqashan etnostardyń Qazaqstan ekonomıkasy men áleýmettik salasynyń jáne mádenıetiniń damýyna qosqan zor úlesin atap júresiz. Bıyl «Qazaqstandaǵy etnostardyń Qazaqstan halqynyń ortaq tarıhı-mádenı murasyna qosqan úlesi» jobasy iske asyryldy. Onda V.Radlov, G.Belger, E.Brýsılovskıı jáne basqalardyń esimderi jazylǵan. Olar barlyq qazaqstandyqtarǵa rýhanı jaqyn jáne bizdiń birligimizdiń altyn arqaýy», - dedi Vıktorııa Tregýbova.
Sonymen qatar, ol Qazaqstan Prezıdenti Qasym-Jomart Toqaev bastamashylyq jasaǵan Abaı Qunanbaıulynyń 175 jyldyǵyna arnalǵan poetıkalyq chellendjge 1000-nan astam túrli etnos jastary belsene qatysqanyn aıtty.
«Assambleıanyń «Jańǵyrý joly» jastar qozǵalysyndaǵy dostarym áleýmettik jelilerdi Abaıdyń óleńderimen, sózderimen, ánderimen toltyrdy. Abaıdyń arqasynda qazaq tili bizdi – túrli etnos jastaryn biriktirdi. Abaı shyǵarmashylyǵyna degen mahabbatymdy osy bir óleń joldarymen pash etkim keledi.
Óleń – sózdiń patshasy, sóz sarasy,
Qıynnan qıystyrar er danasy.
Tilge jeńil, júrekke jyly tıip,
Tep-tegis jumyr kelsin aınalasy.
Óleńge árkimniń-aq bar talasy,
Sonda da solardyń bar tańdamasy.
Іshi altyn, syrty kúmis sóz jaqsysyn
Qazaqtyń kelistirer qaı balasy?
Ǵulama Abaıdyń mol murasyn ǵasyrdan-ǵasyrǵa jetkizetin biz – jastarmyz. Endeshe Abaıdy birge oqıyq, birge zerttep-zerdeleıik, birge tanıyq!», - dedi Vıktorııa Tregýbova.