Vıktor Orban: Atajurtqa oralý qashanda keremet

<p>Qazaqstan men Majarstan arasynda qaýipsizdik máselesiniń talqylanýy óte mańyzdy. Majarstan Premer-Mınıstri Vıktor Orban Memleket basshysy Qasym-Jomart Toqaevpen keńeıtilgen quramdaǵy kezdesý qorytyndysynda osyndaı pikir aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a> agenttigi.</p>

«Atajurtqa oralý árdaıym keremet. Majarlar Qazaqstanǵa kelgende erekshe sezimdi bastan keshedi. Óıtkeni eki halyqty ǵasyrlar qoınaýynan bastaý alatyn tarıhı tamyry baılanystyrady. Sońǵy on jylda yntymaqtastyǵymyzdy damytýǵa bar kúsh-jigerimizdi jumsadyq ári jaqsy nátıjege qol jetkizdik. Ózińizben yntymaqtasa jumys isteý — men úshin zor mártebe. Majarstan árdaıym Qazaqstannyń senimdi strategııalyq seriktesi bolǵan. Aldaǵy ýaqytta da solaı bola beredi. Majarstan men Qazaqstannyń baılanystary buryn-sońdy jetpegen deńgeıge kóterildi. Sondaı-aq yqpaldastyǵymyzdyń, ásirese ekonomıkalyq qatynasymyzdyń áleýeti zor», — dedi Vıktor Orban.

Meıman Qazaqstanǵa sońǵy ret pandemııaǵa deıin kelgenin eske aldy.

«Ol kezde baılanysymyz jaqsy damyp kele jatqan. Biraq, ókinishke qaraı Covid-19 sonyń bárin kidirtip tastady. Búgin sol qarqyndy qalpyna keltirý úshin kelip otyrmyz. Bul óńirdegi baılanysymyz negizinen tarıhı tamyrlastyqpen baılanysty. Biz sizderdiń jetistikterińizge qýanyp otyramyz. Týysymyzda bári jaqsy bolsa, bul bizge de jaqsy. Otbasy tutas baqytty bolǵany jaqsy. Sizder osynda — shyǵystasyzdar, ál biz — batystamyz. Shyǵystyń batysty túsinýi, batystyń shyǵysty túsinýi árdaıym ońaı bola bermeıdi. Biraq osy jerde álemge birlesip kóz tastaýǵa bolady. Biz qazir qaýipsizdik turǵysynan turaqsyz kezeńde ómir súrip jatyrmyz. Bul máselelerdi dostarymyzben, baýyrlas halyqtarmen talqylaý óte mańyzdy. Tek ekonomıka emes, qaýipsizdik máselesin de. Majarstan qazir Eýropanyń kúrdeli bóliginde tur. Іrgemizde Ýkraına men Reseıdiń soǵysy júrip jatyr», — dedi Majarstan Premer-Mınıstri.

Buǵan deıin Aqordada Majarstan Premer-Mınıstrin qarsy alý saltanaty ótkenin jazǵan edik.

Qasym-Jomart Toqaev Vıktor Orbanmen kezdesý kezinde eki eldiń baýyrlastyq baılanysy týraly aıtty. 

Eske salsaq, keshe keshke Vıktor Orbandy Astana áýejaıynda vıtse-premer Serik Jumanǵarın kútip alǵan bolatyn.

Qazaqstan basshylyǵymen kelissóz barysynda Qazaqstan men Majarstan arasyndaǵy saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqty odan ári tereńdetý máseleleri talqylanady dep josparlanyp otyr.

Aıta ketý kerek, Astanada Túrki memleketteri uıymynyń H sammıti ótedi.

Oǵan Ázerbaıjan, Qyrǵyzstan, Túrkııa, Ózbekstan prezıdentteri, baqylaýshy memleketter — Majarstan men Túrikmenstan basshylary qatysady.