Vıtse-premer Jambyldaǵy pılottyq jobanyń júzege asý barysymen tanysty
Kezdesý barysynda vıtse-premerge aýqymdy joba aıasynda aýylda atqarylyp jatqan jumystar jaıy baıandaldy. Búginde atalmysh jobanyń birinshi baǵyty – qosalqy sharýashylyqty tıimdi tabys kózine aınaldyrý boıynsha okrýgtegi 862 aýla aıanbaı jumys jasap, eki aınalymda ónim alýǵa daıyn. Al, ekinshi baǵyt boıynsha 224 aýla jobaǵa qatysýǵa nıet bildirip, jalpy 7 697 bas tórt túlik mal alý úshin qujattaryn ótkizgen. Qostóbe aýyldyq okrýginde «Qostobe-2019» aýyl sharýashylyq óndiristik kooperatıvi barlyq salany qamtý baǵytymen quryldy.
Óz kezeginde Úkimet basshysynyń orynbasary jeke qosalqy sharýashylyqty damytý arqyly, tıimdi tabys kózin qalyptastyrýǵa baǵyttalǵan baıandy bastamanyń mańyzdylyǵyna toqtalyp, onyń Memleket basshysy men Úkimet tarapynan da zor qoldaýǵa ıe bolyp otyrǵandyǵyn jetkizip, qostóbelikterdi jumyla jumys jasaýǵa shaqyrdy.
«Bul jobany júzege asyrýda aýyldyń ár turǵynynyń qatysýy mańyzdy. Barlyq uıymdastyrý máseleleri jan-jaqty qarastyrylǵan. Ásirese, úı irgesindegi, aýyl mańyndaǵy jerlerdi tıimdi paıdalaný, tehnıka, mal satyp alý, kooperatıv qurý sharalary joba aıasynda sheshimin tabýda. Bul oraıda árbir otbasynyń áleýmettik kartasy bolýy kerek. Halyqtyń ıgiligine negizdelgen bul jobany memleket basshysy, Úkimet tarapynan qoldaýǵa ıe bolyp otyr. Endi tek jumys isteýge kerek, – dedi Berdibek Saparbaev.
Sondaı-aq, aýyl turǵyndary ózderin tolǵandyryp júrgen saýaldaryn qoıyp, usynystar aıtty.
«Barlyq jańalyqty birden qabyldaý ońaı bolmaıdy. Biraq biz qoryqpaı, táýekel etsek, barlyq qıyndyqtardy eńserýge bolady. Óıtkeni memleket óz halqyn árdaıym qoldaıdy. Qostóbe aýylynyń basqa turǵyndary sııaqty, men Jambyl oblysy halqynyń tabysyn arttyrý jónindegi jobany tolyq qoldaımyn. Onyń arqasynda aýyldarda qosymsha tabys tabý múmkindigi paıda bolady. Meniń otbasym da osy jobaǵa qatysýǵa nıetti. Qus sharýashylyǵymen aınalysqymyz keledi, et jáne jumyrtqa úı sharýashylyǵymen aınalysqymyz keledi. Meniń oıymsha, óz tabysyn 300 myń teńgege deıin arttyra alamyz»,- dep atap ótti óz sózinde Qostóbe aýylynyń turǵyny Marııa Tóleýǵalıeva.