Vıtse-premer McDonald’s jabylýy týraly: Munyń Boranbaevtyń ustalýyna qatysy joq dep oılaımyn

ASTANA. QazAqparat – QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın Qazaqstanda McDonald’s-tiń jabylýy týraly pikir bildirdi, dep habarlaıdy QazAqparat tilshisi.

«Búkil aqparatty sizderge aıta almaımyn. Óıtkeni men alǵan aqparatty kompanııanyń bas keńesi áli maquldamaǵan. Biraq birshama kólemdegi taýar, 1000-ǵa jýyq atalym ımporttalyp kelgen. Keıbiri ózimizde shyǵarylatyn. Mysaly, toqashtardy «Baıserke-Agro» shyǵaryp keldi. Sondyqtan qazir qaıta qurylymdaý júrip jatyr. Biz kompanııa basshylyǵynan Saýda mınıstrligi tarapynan qandaı kómek kerek ekenin suradyq. Tehnıkalyq retteý komıtetine jumys jyldamdaýy úshin sertıfıkatsııa boıynsha qandaı kómek bere alatynymyzdy qaraýdy tapsyrdym. Bul baǵytta jumys júrip jatyr», - dedi Serik Jumanǵarın.

«Bul oqıǵa Qaırat Boranbaevtyń ustalýyna baılanysty emes pe?», - dep surady jýrnalıst.

«Joq, ondaı áseri bar dep oılamaımyn. Ol bar bolǵany aktsıoner ǵana ǵoı», - dedi vıtse-premer.