Vıtse-premer Berdibek Saparbaev Semeı jurtshylyǵymen kezdesti

SEMEI. QazAqparat - QR Premer-Mınıstriniń orynbasary Berdibek Saparbaev bastaǵan Úkimettik delegatsııa Semeı qalasynyń jurtshylyǵymen kezdesti, dep habarlaıdy QazAqparat primeminister.kz jasap.

Semeıliktermen ótken basqosýda QR Prezıdenti Qasym-Jomart Toqaevtyń «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Joldaýynyń negizgi baǵyttary túsindirildi.

Іs-sharaǵa oblys ákimi Danıal Ahmetov, Eńbek jáne halyqty áleýmettik qorǵaý mınıstri Birjan Nurymbetov, Bilim jáne ǵylym mınıstri Ashat Aımaǵambetov, Mádenıet jáne sport mınıstri Aqtoty Raıymqulova, Densaýlyq saqtaý vıtse-mınıstri Kamaljan Nadyrov, Aqparat jáne qoǵamdyq damý vıtse-mınıstri Danııar Isın, sondaı-aq úkimettik emes jáne jastar uıymdary, bıznes qoǵamdastyqtar, shyǵarmashylyq jáne ǵylym zııalylar ókilderi qatysty.

Vıtse-premer óz sózinde Memleket basshysynyń saıasaty halyqty eńbek etýge shaqyryp, memlekettik qoldaý mehanızmin qoldanýǵa bastaıtynyn atap ótti.

«Bıyl 400 myń otbasyǵa nemese 2 mıllıonǵa jýyq qazaqstandyqqa ataýly áleýmettik kómek taǵaıyndaldy. Alaıda járdemaqynyń jaǵdaıy bar adamdarǵa da tólenip kelgeni anyqtaldy. Eskerte ketetin jaıt, ataýly áleýmettik kómek tek muqtaj jandarǵa ǵana kórsetilýi tıis. Al eńbekke jaramdy adamdar jumys isteýi tıis. Eger mamandyǵy joq bolsa, oqytyp, jumys taýyp berýge, grant pen shaǵyn nesıe alýǵa, jeke bıznesin ashýǵa qoldaý kórsete alamyz. Áleýmettik qoldaý qoǵamdy memleket asyraıdy degen bildirmeýi kerek», - dep atap ótti B. Saparbaev.

Sondaı-aq, jas býynnyń tárbıesi men otbasylyq qundylyqtardy saqtaý máselelerine basa toqtaldy.

«Ókinishke oraı, jastar arasynda, onyń ishinde kámelettik jasqa tolmaǵan balalardyń ortasynda qylmys pen zorlyq-zombylyq jaǵdaılary órship barady. Sondyqtan memleket pen qoǵam birlese otyryp osy baǵytta tıimdi jumys isteýi kerek. Ata-analar balalaryna sanaly tárbıe berip, adamgershilik, moraldyq qasıetterin boılaryna sińire ósýine zor kóńil bólýi tıis», - dedi ol.

Kezdesý barysynda turǵyndarmen qoǵamdyq kelisimdi nyǵaıtý, ana men balany qoldaý, densaýlyq saqtaý jáne áleýmettik qorǵaý salalaryndaǵy qyzmet kórsetý sapasyn arttyrý, mádenıet pen sportty damytý sııaqty basqa da máseleler talqylandy.

Vıtse-premer Semeıdegi Jedel medıtsınalyq járdem aýrýhanasynda biregeı angıografııalyq qurylǵymen jasaqtalǵan gıbrıdti operatsııa jasaý bóliminiń jumysymen tanysty.

Respýblıka boıynsha birinshi bolyp Semeıde ashylǵan gıbrıdti operatsııalyq bólimniń ereksheligi sonda, naýqastarǵa bir mezgilde birneshe ashyq ádispen jáne ınterventsııalyq aralasý arqyly keshendi gıbrıdti ota jasaýǵa múmkindik beredi.

Gıbrıdti ota jasaý qondyrǵysyn ornatý jáne ǵımaratty qaıta qalpyna keltirý jumystaryna jergilikti bıýdjetten 2,3 mlrd teńge, onyń ishinde jabdyqtaýǵa 1,7 mlrd teńge jumsaldy. Aıta keteıik, keshen halyqaralyq JCI talaptaryna saı, «altyn» standart júıesi boıynsha salyndy. Ortalyq ashylǵaly beri 263 operatsııa jasalyndy. Jalpy jyl saıyn 2,9 myń operatsııa jasaý jospary tur.

Elektr tehnıkalyq kolledjinde ótken jıyn barysynda Berdibek Saparbaev bilim salasyndaǵy memlekettik baǵdarlamalardy júzege asyrý, qyzmet kórsetý sapasyn arttyrý, muǵalimderdiń áleýmettik mártebesin kóterý sııaqty basqa da máselelerdi kóterdi.

Vıtse-premerdiń jumys sapary Óskemen men oblystyń basqa aýdandarynda jalǵasady.