Vıtse-premer Atyraý oblysyndaǵy kópbalaly otbasylarmen kezdesti
Búgin Atyraý oblysyna jumys saparymen kelgen úkimettik komıssııa jumysyn jalǵastyrdy. Respýblıkalyq «Áleýmettik qamqorlyq» baǵdarlamasy aıasynda QR Premer-Mınıstriniń orynbasary Gúlshara Ábdiqalyqova aımaqtaǵy kópbalaly otbasylarmen kezdesti. Úkimettik komıssııa tórtten segiz balaǵa deıin tárbıelep otyrǵan kópbalaly otbasylarǵa bardy. Mysaly, kópbalaly ana Zýlfııa Qaıyrova alty bala tárbıelep otyr. Otbasy aıyna 45 myń teńgege shaǵyn jeke úıdi jalǵa alǵan. «Kúmis alqa» ıegeri qazir dekrettik demalysta. Zýlfııanyń joldasy júrgizýshi bolyp jumys isteıdi, jalaqysy - 150 myń teńge. Memleketten alatyn járdemaqylardy qosa eseptegende otbasynyń jalpy tabysy baspana alý úshin qarajat jınaýǵa jetpeıdi.
Vıtse-Premer Gúlshara Ábdiqalyqova kópbalaly anaǵa ataýly áleýmettik kómek pen turǵyn úı kómegin alý erejelerin túsindirý kerektigin aıtty. Zýlfııanyń óńirdegi «Іsker ana» jobasyna qatysýy otbasylyq jaǵdaıdyń jaqsarýyna septigin tıgizbek.
«Kýrsqa qatysý arqyly jańa mamandyqty meńgerip qana qoımaı, ózińizge unaǵan kez kelgen mamandyq boıynsha qaıta oqýǵa bolady. Aldaǵy kúnderi jeke kásip ashýǵa bir rettik qaıtarymsyz aqshalaı sertıfıkat berýdi bastaımyz. Mamyr aıynan bastap kóp balaly otbasylarǵa jalǵa beriletin úı, tıimdi sharttarmen ıpotekalyq nesıe beriledi, osy sharalar eldiń ál-aýqatyn kóterip, problemalardy sheshedi degen senimdemiz», - dedi Gúlshara Ábdiqalyqova.
Úkimettik komıssııa barǵan kópbalaly otbasylardyń basym bóligin turǵyn úı máselesi, jubaılardyń biriniń jumysy bolmaýy, memlekettik qoldaý týraly nasıhattyń azdyǵy tolǵandyrdy. Aýyldan kóship kelgender úshin qalaǵa tirkeýge turý máselesi ózekti.
Eńbek jáne halyqty áleýmettik qorǵaý mınıstri Berdibek Saparbaev ár áıelmen jeke sóılesip, jeńildikter men áleýmettik tólemder týraly túsindirdi.
«Atyraý oblysyna memleket basshysynyń tapsyrmasymen jańa áleýmettik reformany túsindirý maqsatynda keldik. «Áleýmettik qamqorlyq» baǵdarlamasynyń arqasynda eshbir otbasy nazardan tys qalmaıdy, osy maqsatta respýblıkalyq bıýdjetten qarajat bólinip otyr. Bizdiń mindetimiz - ár qazaqstandyqtyń memleketten naqty kómek alýyn qamtamasyz etý»,-dep atap ótti Berdibek Saparbaev.
Jumys saparynyń sońynda QR Premer-Mınıstriniń orynbasary Gúlshara Ábdiqalyqova men Berdibek Saparbaev azamattardy qabyldady. Kópbalaly analar tıisti áleýmettik tólemder týraly, áleýmettik osal toptaǵylar memlekettik qoldaý sharalary týraly málimet aldy.