Vıtse-mınıstr: Jańa zań dinı ahýaldyń turaqtylyǵyna kepildik beredi
Vıtse-mınıstr Berik Aryn bıýdjettik uıymdardyń qyzmetkerleri, dinı uıymdardyń ókilderimen jáne «Aqnıet» QQ, «Jeztaǵylym», «Fýrhan», «Úmit mekeni» qoǵamdyq uıymdarynyń basshylarymen, sondaı-aq «Qazaqmys» JShS Korporatsııasynyń eńbek ujymymen kezdesti.
Qaraǵandy oblysynda beıbitshilik pen kelisimdi nyǵaıtýǵa óz úlesin qosyp otyrǵan 314 dinı birlestik jumys isteıdi. Degenmen, óńirde destrýktıvti dinı ıdeologııanyń taralýyna jáne onyń teris áser etýine yqtımal máseleler áli de bar.
Kezdesý barysynda Din isteri jáne azamattyq qoǵam vıtse-mınıstri Berik Aryn eldegi dinı ahýaldy jaqsartý boıynsha qabyldanatyn sharalar týraly, destrýktıvti aǵymdardyń yqpalyna jáne qyzmetine qarsy turý jaıynda áńgimeledi. Vıtse-mınıstrdiń aqparatyna sáıkes, qazirgi kúni Mınıstrlik ázirlep jatqan - dinı qyzmet jáne dinı birlestikter máseleleri týraly zań jobasy Qazaqstan Respýblıkasynyń Úkimetiniń qaraýyna engizilgen.
«Zańnamaǵa engiziletin túzetýler eldegi dinı ahýaldyń turaqtylyǵyn qamtamasyz etýge, destrýktıvti dinı aǵymdardyń ıdeıalaryn taratýdy boldyrmaýǵa baǵyttalǵan. Sonymen birge, halyqtyń usynystary da nazardan tys qalmaýy qajet, turǵyndar óz tarapynan teris dinı aǵymdardyń aldyn alý jumystarynda belsendilik tanytýy kerek», - dep Berik Aryn óz pikirimen bólisti.
Al, senator Sergeı Ershov Jezqazǵandyq jerlesterin atalǵan máselege qarsy kúreste qoǵamda belsendi bolyp, barlyq kúsh-jigerlerin biriktirýge shaqyrdy. Halyq qalaýlysy jas urpaqtyń teris dinı aǵymdarǵa bet burmaı, boılaryn aýlaq ustaýlary kerektigin ashyq aıtty.
Budan bólek, Din isteri jáne azamattyq qoǵam vıtse-mınıstri B.Aryn «Aknıet» qoǵamdyq qorynyń jergilikti fılıalyna baryp, osy ortalyqtyń ońaltý kýrstarynda júrgen adamdarmen kezdesti.