Vıtse-mınıstr sportty qarjylandyrý tetigi qalaı jumys isteıtinin túsindirdi
«Sport túrlerinen bıýdjet qarajatynyń ashyqtyǵy men ony teńgerimdi bólýdi qamtamasyz etý maqsatynda 2017 jyly zańnamaǵa sport túrlerin saralaý túsinigi engizildi. Erejege sáıkes júrgizilgen saralaý rásimderi nátıjesi boıynsha aldaǵy eki jylǵa sporttyń basymdyqty tizbesi bekitiledi», - dep toqtaldy vıtse-mınıstr Ortalyq kommýnıkatsııalar qyzmetinde.
Onyń aıtýynsha, atalǵan tizbe sport túrlerine qarajatty bólý kezinde negiz bolady.
«Saralaý kórsetkishterin aıqyndaýdyń negizgi krıterılerine jarystarda tıisti sport túri boıynsha sportshylardyń jetistikteri, materıaldyq-tehnıkalyq bazanyń bolýy, óńirdiń klımattyq jaǵdaıyna sport túrleri erekshelikteriniń araqatynasy jatady. Osynyń nátıjesinde sport túrleri negizgi úsh topqa bólinedi. Birinshisi – damyǵan sport túrleri, ekinshisi – joǵary áleýetke ıe sport túrleri, úshinshisi – damýdyń tómen áleýetine ıe sport túrleri. Osy arqyly, qazirgi kezde sportty qarjylandyrýdyń modeli ázirlendi. Bul óz kezeginde respýblıkalyq deńgeıde qarajatty obektıvti bólýge kepildik beredi», - dedi spıker.