Vıtse-mınıstr sot oryndaýshylar jumysynyń basty kemshilikterin atady

ASTANA. QazAqparat - Alımenttik shaǵymdardyń ýaqtyly qaralýy, azamattardy qabyldaý, memleketke tıisti somany óndirý jónindegi tapsyrmalardy barlyq departamentter qamtamasyz etken joq. QR Ádilet mınıstri Marat Beketaevtyń tóraǵalyǵymen ótip jatqan alqa otyrysynda Ádilet mınıstriniń orynbasary Janat Eshmaǵambetov osylaı dedi, dep habarlaıdy QazAqparat tilshisi.

«Sot oryndaýshylar qyzmetiniń tıimdiligin jetildirý úshin biz Parlament Májilisinde qaralyp jatqan zań jobasyna tıisti zańnamalyq túzetýler ázirledik. Atalǵan túzetýler sot oryndaýshylarynyń jaýapkershiligin arttyrýǵa, ýákiletti organnyń jáne onyń aýmaqtyq bólimsheleriniń baqylaýyn kúsheıtýge, jekelegen normalardy naqtylaýǵa baǵyttalǵan», - dedi vıtse-mınıstr.

Janat Eshmaǵambetovtyń aıtýyna qaraǵanda, esepti kezeńde sot oryndaýshylarynyń oryndaýynda 4 trln 442 mlrd teńge somasyndaǵy shamamen 3 mln qujat bolǵan.

«2017 jyldyń uqsas kezeńimen salystyrǵanda ótken jyly tolyq kólemde oryndalǵan qujattardyń jalpy kórsetkishi 11 paıyzǵa kóbeıdi. Mınıstrliktiń 2018 jylǵa arnalǵan Strategııalyq josparynyń nysanaly ındıkatorlaryna qol jetkizildi. Josparly kórsetkish 59 paıyz bola tura, tolyq kólemde oryndalǵan qujattardyń úlesi 68,7 paıyzǵa jetti», - deıdi ol.

Vıtse-mınıstrdiń sózinshe, 2017 jylmen salystyrǵanda bıýdjetke túsken soma kórsetkishi 10 paıyzǵa artqan (2017 jylǵy 20 mlrd teńgeden 2018 jyly 22 mlrd teńgege deıin).

«Dese de, men kórsetken oń nátıjelerge qaramastan, aýmaqtyq departamentterde tómen atqarýshylyq tártippen baılanysty birqatar másele bar. Alqa qorytyndysy boıynsha isterdiń áleýmettik mańyzy bar sanattary jóninde, atap aıtsaq alımentter, shaǵymdar men aryzdardyń ýaqtyly jáne sapaly qaralýy, azamattardy qabyldaý jáne memleket kirisine somalardyń barynsha óndirilýi jóninde qabyldanyp jatqan sharalardyń tolyqtyǵyn qamtamasyz etý tapsyrylǵanyn eskergen jón. Kórsetilgen tapsyrmalardyń tıisinshe oryndalýyn barlyq departamentter qamtamasyz etken joq», - deıdi Janat Eshmaǵambetov.