Vıtse-mınıstr Shymkenttegi «Rýhanı jańǵyrý» jumystarymen tanysty

ShYMKENT. QazAqparat –QR Aqparat jáne qoǵamdyq damý vıtse-mınıstri Danııar Esın Shymkenttegi «Rýhanı jańǵyrý» keńsesiniń jumystarymen tanysty, dep habarlaıdy QazAqparat tilshisi.

Vıtse-mınıstr aldymen qala ımamdarymen kezdesti.

«Shymkent qalasynda 104 meshit bar. 68 ımamǵa resmı jalaqy taǵaıyndalǵan. Ortalyq meshitimizge 5 myń adam syıady. Munda kelýshilerge tolyq jaǵdaı jasalǵan. Kommýnaldy tólemder jeke kásipkerlerdiń esebinen tólenedi. Aı saıyn dinı monıtorıng júrgizip otyramyz», - dedi QMDB-nyń Shymkent qalasy boıynsha ókil ımamy Baqtybaı Beısenbaev.

Budan keıin Danııar Esın bastaǵan top Shymkent qalasy boıynsha «Rýhanı jańǵyrý» keńsesin aralap kórdi. Keńseniń jetekshisi Záýre Oralbaeva Elbasynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» baǵdarlamalyq maqalalary aıasynda atqarylǵan jumystar men jańalyqtar barysyn baıandady. Dástúrdi dáripteıtin «Dástúrim - asyl qazynam», «Ulttyq kıimder» atty qos kitaptyń jaryq kórgenin aıtyp ótti.

Sondaı-aq, ólketanýǵa, kıeli jerlerge baılanysty baspadan shyqqan basqa da anyqtamalyqtar tanystyryldy. «Qazaqstannyń Kıeli jerleriniń geografııasy» beınerolıgi kórsetildi.