Vıtse-mınıstr Kemelbek Oıshybaev Túrkııanyń iri medıaholdıngi «TRT» basshysymen kezdesti

NUR-SULTAN. QazAqparat - Túrki keńesi medıaforýmynyń jumysy aıasynda QR Aqparat jáne qoǵamdyq damý vıtse-mınıstri Kemelbek Oıshybaev Túrkııanyń iri memlekettik medıaholdıngi «TRT» basshysy Mehmet Sobadjımen kezdesti, dep habarlaıdy QazAqparat QR Aqparat jáne qoǵamdyq damý mınıstrliginiń Facebook-tegi paraqshasyna silteme jasap.

Kemelbek Oıshybaev medıa salasy mamandaryn oqytýdy uıymdastyrý jáne birlesken kontent qurý salasyndaǵy yntymaqtastyqty odan ári damytý qajettigine nazar aýdardy.

Óz kezeginde M.Sobadjı «Qorqyt Ata» teleserıalyn túsirýdi uıymdastyrý boıynsha birlesken joba qurýdy tolyq zerdeleýge daıyn ekenin bildirdi. Ol birlesken kontent qurý Qazaqstan men Túrkııa halyqtarynyń mádenı baılanystaryn damytýǵa, sondaı-aq týrızmdi damytýǵa yqpal etetinin atap ótti.

Esterińizge sala keteıik, 2021 jyldyń 22-24 qazan aralyǵynda Ystanbulda Qazaqstan, Túrkııa, Ázerbaıjan, Ózbekstan, Qyrǵyzstan, Túrikmenstan jáne Majarstan memlekettik organdary ókilderiniń, aqparat salasyndaǵy basshylar men sarapshylardyń, ǵalymdardyń, jýrnalısterdiń, blogerler men qoǵam belsendileriniń qatysýymen Túrki Keńesiniń medıaforýmy ótip jatyr.

Forýmnyń kún tártibinde – túrki áleminiń damý perspektıvalaryna, kınoındýstrııaǵa, áleýmettik jelilerge jáne óskeleń urpaqty tárbıeleýge qatysty máseleler tur.

Forým jumysyna Qazaqstan delegatsııasynyń quramynda QR Aqparat jáne qoǵamdyq damý vıtse-mınıstri Kemelbek Oıshybaev, Qazaqstannyń Azamattyq alıansynyń prezıdenti Baný Nurǵazıeva, elimizdiń jetekshi BAQ basshylary: Lázzat Tanysbaı («Qazaqstan» RTRK), Eldos Nashıralı (QazAqparat), «Qazaqfılm» AQ prezıdenti Aqan Sataev, qoǵam qaıratkeri Toǵjan Qojalıeva, aktrısa Almıra Tursyn jáne t.b. qatysady.

Forým erteń, 2021 jyldyń 24 qazanynda, tanymal túrik tarıhı serıaldary túsirilgen platformaǵa ekskýrsııamen aıaqtalady.