Vıtse-mınıstr: Qazaqstanda AÓK salasyn memlekettik qoldaý deńgeıi EAEO elderinen tómen

NUR-SULTAN. QazAqparat –Qazaqstanda agroónerkásip salasyn memlekettik qoldaý sharalarynyń deńgeıi EAEO elderindegi jaǵdaıdan qaraǵanda tómen. Bul týraly QR Aýyl sharýashylyǵy birinshi vıtse-mınıstri Aıdarbek Saparov aıtty, dep habarlaıdy QazAqparat tilshisi.

«Qazirgi ýaqytta Eýrazııalyq ekonomıkalyq odaq elderindegi seriktesterimizden qaraǵanda, Qazaqstanda memlekettik qoldaý deńgeıi tómen. Máselen, Belarýs jalpy ishki ónimniń 8,1 paıyzyn, Reseı 6,3 paıyzyn aýyl sharýashylyǵyn qoldaýǵa jumsaıdy. Al bizde Qazaqstanda bul kórsetkish 5 paıyzdy ǵana quraıdy. Sonymen qatar, bizde AÓK salasyndaǵy memlekettik baǵdarlamalardy jeke qarjylandyrmaý deńgeıi 140 mlrd teńgege jetip otyr», - dedi Aıdarbek Saparov Parlament Senatynda ótip jatqan dóńgelek ústel barysynda.

Vıtse-mınıstrdiń aıtýyna qaraǵanda, agroónerkásip saıasaty departamenti EAEO elderindegi memlekettik qoldaý sharalaryna sholý jasap kórgen.

«Máselen, Reseıde AÓK sýbektilerin jeńildetilgen nesıe 1-5 paıyzben usynylsa, Qazaqstanda 6-8 paıyzben beriledi. Reseıde aýyl sharýashylyǵy tehnıkasynyń lızıngi 3,5 paıyzben, al bizdegi «Qazagroqarjylandyrý» lızıngi boıynsha 4-7 paıyzben usynylady. Sol sekildi RF-da alǵashqy jarnany ótep berý sekildi jańa mehanızmder iske qosylyp jatyr. Kórshiles Ózbekstanda da dál osyndaı jeńildikter kúshine ene bastady», - dedi ol.