Vıtse-mınıstr: Baǵany ustaýda turaqtandyrý qorynan bas tartyp, naryqtyq modelge kóshemiz

PETROPAVL. QazAqparat – Petropavlda kásipkerlermen, jurtshylyq ókilderimen kezdesken QR saýda jáne ıntegratsııa birinshi vıtse-mınıstri Arman Shaqqalıev olardyń ózekti suraqtaryna jaýap berdi. Sonyń biri – baǵanyń ósýine qatysty boldy, dep habarlaıdy QazAqparat tilshisi.

Elimizde azyq-túliktiń, jalpy baǵanyń kúnnen-kúnge ósip jatqany belgili. Kezdesýge kelgender bul máselený sheshýde qandaı sharalar qolǵa alynǵanyn surady.

QR saýda jáne ıntegratsııa birinshi vıtse-mınıstri Arman Shaqqalıevtyń aıtýynsha, vedomstvo birtindep tikeleı baǵany retteýden bas tartpaq, osylaısha naryqtyq úlgige kóshpek. Óıtkeni turaqtandyrý qory arzan baǵaǵa satyp alǵan ónim kólemi maýsymaralyq kezeńde sórelerge shyǵarylǵanymen, ol naryqqa aıtarlyqtaı áser etpeıdi.

«Baǵaǵa áser etýi úshin bul kólem jetkiliksiz. Sondyqtan, basqa jolyn izdeý qajet. Máselen taýar óndirýshilerdiń aınalymdaǵy qarjysyn qarjylandyrý tıimdirek bolmaq. Osy jerde tıptik talaptar modeliniń ózgerip, soǵan sáıkes qarajat bir jyl buryn bólinetinin habarlaǵym keledi. Bul aýyl sharýashylyǵy taýaryn óndirýshilerge qajetti qarajatty forvardtyq ádispen qańtar aıynda alýǵa múmkindik beredi. Ony janar-jaǵar maıǵa, tuqym alýǵa jáne basqa da qajettilikterine jumsaı alady. ıAǵnı, biz naryqtyq modelge kóship, baǵany tikeleı retteýden kezeń-kezeńimen ketemiz. Memleket baǵa belgileý máselelerine tikeleı aralaspaıdy dep topshylap otyrmyz», - dedi Arman Shaqqalıev.