Vıtse-mınıstr: Ákimder halyqpen kezdesýde zaldy memqyzmetshilermen toltyrmaýy tıis

NUR-SULTAN. QazAqparat – Ákimder halyqpen kezdesýde zaldy memlekettik qyzmetshilermen nemese bıýdjet qyzmetkerlerimen toltyrmaýy tıis. Bul týraly QR Ulttyq ekonomıka vıtse-mınıstri Baýyrjan Omarbekov aıtty, dep habarlaıdy QazAqparat tilshisi.

«Ákimderdiń qoljetimdiligine qatysty kóp syn aıtyldy. «Kórmeımiz», «Kezdese almaıyz», «Eseptik kezdesýde bolmasa basqa ýaqyt aldyna kirý múmkin emes» degen sııaqty syn kóp boldy. Bul (Prezıdenttiń ákimderdiń halyqpen kezdesýlerin ótkizý týraly Jarlyǵy) sonyń aldyn alý úshin jasalyp otyr. Biz halyqtyń ýaqytyn da, qarajatyn da únemdeý maqsatyn alǵa qoıdyq. Mysaly, elimizde oblys ortalyǵy men eldi mekenderdiń arasy 500-600 shaqyrymǵa deıin shalǵaı. Endi oblys ákimderi aldaryna ózi kelip turǵannan keıin turǵyndardyń ýaqyty, qarajaty únemdeledi. Sonymen qatar kez kelgen turǵyn óziniń máselesin ákimmen tikeleı baılanysta sheshýge múmkindik alady dep oılaımyn», - dedi vıtse-mınıstr «Habar-24» telearnasyndaǵy «Suhbat» baǵdarlamasynda.

Sonymen qatar ol buǵan deıin ákimderdiń kezdesýin uzyn-sonar baıandamalarǵa, statıstıkalyq derekterge qurý derekteri bolǵandyǵyn da atap ótti.

«Sol sebepti bul máseleni de júıelendirýge tyrystyq. Qazir Jarlyqta naqty kórsetilgen. ıAǵnı, kezdesýdiń ary ketkende tórtten bir bóligi ǵana baıandama jasaýǵa arnalady. Baıandamada Qazaqstannyń jańa damý baǵyttaryn, aldaǵy josparlar jáne atqarylǵan jumystar boıynsha qysqasha aıtyp, kezdesýdiń negizgi bóligin suraq-jaýapqa beriledi», - dedi ol.

Baýyrjan Omarbekov endigi ýaqytta ákimdermen kezdesýde aldyn ala daıyndalǵan suraqtardyń bolmaıtynyn aıtty.

«Ákimderge jiberilgen jadynamada naqty kórsettik. Úlken zaldarǵa halyqty jınaý jáne ony memlekettik qyzmetshilermen nemese bıýdjettik qyzmetkerlermen toltyrmaýy kerek. Ákimderdiń halyqpen kezdesýiniń ıkemdi kúntizbelik jospary bekitilip, ol halyqqa aldyn ala jarııalanady», - dedi vıtse-mınıstr.