Vıtse-mınıstr: Ákim laýazymyna kandıdatýrany aýyl turǵyndary ózderi usynady
Ulttyq ekonomıka vıtse-mınıstri Álisher Ábdiqadyrovtyń aıtýynsha, 800 aýyl ákimin tikeleı saılaý osy jyldyń ekinshi jartyjyldyǵynda, qazirgi ákimderdiń ókilettik merzimi shyqqan kezde ótedi. Óz kandıdatýrasyn aýyl turǵyndarynyń ózderi de, óz músheleriniń arasynan tirkelgen saıası partııalar da usyna alady.
Sondaı-aq, aýyl ákimdigine kandıdattar bolmaǵan ne usyný merzimi aıaqtalǵan kezde bir ǵana kandıdat usynylǵan jaǵdaıda, aýdan (oblystyq mańyzy bar qala) ákiminiń jergilikti qaýymdastyq jınalysynyń kelisimi boıynsha eki kandıdatqa deıin saılaýǵa qatysýdy qamtamasyz ete otyryp, kandıdattardy nemese óz kandıdatyn usynýǵa quqyǵy bar.
«Aýyl ákimderiniń ókilettik merzimine keler bolsaq, ol ózgerissiz qalady jáne 4 jyldy quraıdy», — dep tolyqtyrdy ulttyq ekonomıka vıtse-mınıstri.
Aýyl ákimderiniń tikeleı saılaýyn qarjylandyrý jergilikti bıýdjet arqyly júzege asyrylady. 2021-2022 jyldarǵa arnalǵan jalpy sıpattaǵy transfertterdiń qoldanylý kezeńinde saılaýdy qarjylandyrý OSK arqyly respýblıkalyq bıýdjetten nysanaly transferttermen júzege asyrylatyn bolady. 2023 jyldan bastap bul shyǵystar jergilikti bıýdjetterdiń shyǵystar bazasyna engiziledi jáne jalpy sıpattaǵy transfertterdi esepteý kezinde eskeriletin bolady. Jergilikti bıýdjetterge toqtalyp ótsek. Qazaqstanda 2018 jyldan bastap aýyldyq okrýgter deńgeıinde derbes bıýdjet engizildi, ol bıýdjettiń tórtinshi deńgeıi retinde aıqyndaldy. Jergilikti ózin-ózi basqarý bıýdjeti berilgen salyqtyń 6 túri esebinen qurylady. «Jergilikti bıýdjetterdi engizý kezeń-kezeńmen júrgizildi. 2018 jyldan bastap halqynyń sany 2000 adamnan asatyn ákimshilik-aýmaqtyq birlikterde, al bul shamamen aýdandyq mańyzy bar 1052 qalada, aýyldarda, kentterde jáne aýyldyq okrýgterde, al 2020 jyldan bastap – barlyq jerde. Sonyń nátıjesinde 2345 aýyldyq okrýg derbes bıýdjet aldy», — dedi Á. Ábdiqadyrov.
Jergilikti ózin-ózi basqarý bıýdjetiniń kiris kózderin odan ári keńeıtý maqsatynda bıýdjet zańnamasyna tólemderdiń taǵy 4 túrin jergilikti ózin-ózi basqarý deńgeıine berýdi kózdeıtin túzetýler ázirlendi.
Qazirgi ýaqytta osy túzetýleri bar zań jobasy Parlament Májilisiniń qaraýynda jatyr.
Eske salsaq, Prezıdent Qasym-Jomart Toqaev óziniń 2020 jylǵy 1 qyrkúıektegi «Jańa jaǵdaıdaǵy Qazaqstan: is-qımyl kezeńi» atty Joldaýynda aýyl ákimderin tikeleı saılaýdy engizý qajettigi týraly málimdedi. Memleket basshysy muny eldi demokratııalandyrýdaǵy jáne jergilikti basqarý ınstıtýttaryn nyǵaıtýdaǵy mańyzdy qadam dep atady.