Vıtse-mınıstr Abaı oblysynda aýrýhanada jatqan órt sóndirýshilerdiń kóńilin surady

SEMEI. QazAqparat – QR Tótenshe jaǵdaılar vıtse-mınıstri Marat Kúldikov Abaı oblysynda aýrýhanada jatqan órt sóndirýshilerge baryp, jaǵdaılarymen tanysty, dep habarlaıdy QazAqparat tilshisi.

Abaı oblystyq TJD baspasóz qyzmetiniń málimetine súıensek, Tótenshe jaǵdaılar vıtse-mınıstri Marat Kúldikov Jarma aýdanyndaǵy dala órtimen kúres barysynda kúıip qalǵan órt sóndirýshilerge arnaıy barǵan.

- Vıtse-mınıstr men oblystyq TJD bastyǵy Manarbek Shapaǵatov birinshi Semeı qalasyndaǵy jedel medıtsınalyq járdem aýrýhanasynda jatqan Amangeldi Turlybekovtyń jaǵdaıymen tanysty. Qyzmetine adaldyq tanytqan órt sóndirýshige ІІІ dárejeli «Aıbyn» ordeni tabystaldy, - delingen aqparatta.

Sodan keıin olar Jarma aýdany Shar qalalyq aýrýhanasyna baryp, denesin ár túrli dárejede kúıik shalǵan 22-órt sóndirý beketiniń qutqarýshysy Nurlan Sálimjannyń jaǵdaıyn bilip qaıtty.

Oǵan «Erligi úshin» medali berildi. Qazirgi ýaqytta ekeýi de dárigerlerdiń turaqty baqylaýynda.

Eske salsaq, osyǵan deıin Abaı oblysynda jalyn sharpyǵan aýmaq 5000 gektarǵa jetkenin habarlaǵan bolatynbyz.

Abaı oblysynyń Jarma aýdanynda 3 órt sóndirýshini kúıik shalyp, onyń biri kóz jumǵan edi.

Órt sóndirýshilerdiń biriniń jaǵdaıy aýyr bolatyn.

Óńirdegi dala órtteri 9 qyrkúıek kúni tańerteń oqshaýlanyp, sol kúni tolyqtaı sóndirilgen.