Veıpke tyıym salý arqyly balalardy qorǵaımyz – depýtat
«Bul sheshim jetinshi shaqyrylymnan beri talqylanyp keledi. Úkimet qandaı da bir qatań retteýdi engizýge múmkindik berdi, bizdiń fraktsııa birneshe ret Premer-mınıstr men Densaýlyq saqtaý mınıstrliginiń basshylaryna bul máseleni aıtty. Jetinshi shaqyrylymda bul másele komıtetimizdiń is-sharalar josparyna engizildi. Ortaq sheshimge kele almadyq jáne qatań retteýdi engize almadyq. Bazarlarda, Almatynyń baraholkasynda qap-qabymen satylyp jatyr. Keshe qoǵamdyq balalar qory 400-ge jýyq jasóspirim qatysqan áleýmettik saýalnamany jarııalady. Zertteý kórsetkendeı, Almaty men Astana jastarynyń 80%-y veıp qoldanady. Bul qorqynyshty, osy tyıym arqyly balalarymyzdy qorǵaımyz dep oılaımyz», - dedi Elnur Beısenbaev Májilis kýlýarynda.
Depýtattyń aıtýynsha, munda kóleńkeli saýda da bolýy múmkin.
«Biz tyıym salǵan sıntetıkalyq esirtki men snıýs boıynsha sur naryq bar. Kóleńkeli saýda barlyq ýaqytta da bolady, biraq eń bastysy – biz kem degende balalardy qorǵaımyz. 10-12 jastaǵy balalar endi elektrondy temeki satyp ala almaıdy», - dedi ol.
Sondaı-aq tilshiler depýtattan nelikten temekige tyıym salynbaıtynyn surady.
«Kelisemin. Biraq birinshiden, kez kelgen ata-ana balanyń temeki shegetinin ıisinen bile alady. Al veıpti anyqtaý óte qıyn, olar qulpynaı sııaqty tátti ıis shyǵarady. Tipti panda túrindegi jarnamalar balalarǵa baǵyttalǵan. Veıpti ákelýge, taratýǵa, satýǵa tyıym salynady. Oǵan ákimshilik aıyppuldar kózdeledi. Sanktsııalar pysyqtalyp jatyr, olar ákimshilik kodekske qatar engiziledi», - dedi Elnur Beısenbaev.
Eske sala ketsek, Májilis veıpterge tyıym salatyn zańdy qabyldady.