Veıp pen kalıanǵa tyıym salý kóleńkeli naryqtyń ósýine alyp keldi — UKP ókili

<p>ASTANA. KAZINFORM &mdash; &laquo;Atameken&raquo; ulttyq kásipkerler palatasynyń agroónerkásip kesheni jáne tamaq ónerkásibi departamentiniń basqarýshy dırektory Erken Naýryzbekov elimizde veıp satýǵa jáne kalıan tartýǵa tyıym salýdyń saldary týraly aıtty.</p>

Onyń aıtýynsha, tyıym salý sharasy keri áser etedi jáne jaǵdaıdy ýshyqtyra túsedi.

— Veıp satýǵa tyıym salyndy, biraq tutynýǵa tyıym salynbaǵan, sondyqtan naryqta áli de bar, ıaǵnı tyıym ústine tyıym bolyp tur. Aldymen kámeletke tolmaǵandarǵa satýǵa tyıym salyndy, keıin eresekterge de satýǵa tyıym salý týraly sheshim qabyldandy. Dese de Densaýlyq kodeksiniń 110-baby boıynsha balalarǵa ǵana tyıym salynǵan. Terrıtorııasy aýqymdy elimizge tyıym salynǵan taýarlardyń aǵynyn tolyq baqylaý múmkin emestigin basynda-aq eskertken edik. Nátıjesinde memlekettik organdarǵa júkteme artyp, zańsyz naryq damýyn jalǵasýda, — dedi Erken Naýryzbekov elordada «Temeki jáne nıkotın ónimderiniń kontrabandasy jáne kontrafaktisi: EAEO ekonomıkasy men ulttyq qaýipsizdigine qater» taqyrybynda ótken baspasóz máslıhatynda.

Foto: Kazinform

Sondaı-aq ulttyq kásipkerler palatasynyń ókili qoǵamdyq tamaqtaný oryndarynda kalıan shegýge tyıym salý máselesine toqtaldy.

— Densaýlyq kodeksinde meıramhana, dámhana jáne laýndj-barda kalıan tartýǵa tyıym salynǵan. Biraq úı jaǵdaıynda paıdalanýǵa bolady jáne kalıan qospalaryn ákelý shekteý joq. Qoǵamdyq tamaqtaný oryndarynda kalıanǵa tyıym salýdyń nátıjesinde bul bıznestiń bir bóligi kóleńkege ketti, qalǵany tolyǵymen jabyldy. Bul shamadan tys retteýdiń keri áser etetinin taǵy da rastaıdy, — dedi ol.

Bıznesti qorǵaýshynyń málimdeýinshe, tyıym naryqta teń emes jaǵdaıdy týǵyzady.

— Zańdy saqtap, ónimdi tańbalaǵan, aktsız tólegen jáne jas shekteýin baqylaýda ustap kásip etken kompanııalar jabylýǵa májbúr boldy. Al talaptarǵa baǵynbaıtyn zańsyz bıznes jumysyn jalǵastyryp jatyr. Olardyń naryqta básekelesteri joq, al bul alańdatarlyq jaǵdaı. Biz salany baqylaýdy joǵalttyq, — dep túsindirdi E. Naýryzbekov.

Búginde tyıym salýdan zardap shekken kásipkerler ulttyq palatadan kómek suraýdy jalǵastyrýda.

— Kóptegen kásipker máseleni retteýdiń balama tásilderin usyndy. Mysaly, qoǵamdyq tamaqtaný ornynda (dámhana, meıramhana, laýndj-bar) kalıan tartýǵa jeke bólme qarastyrý, bólmege jeldetý júıesin qosý jáne sanıtarlyq talaptardy qatań saqtaý sekildi. Adamdar báribir amalyn taýyp, zańsyz arnalardan alyp tutynyp jatyr. Shyǵyndy azaıtý úshin tepe-teńdikti saqtaýymyz kerek, — dep qorytyndylady Atameken ókili.

Aıta keteıik, bıyl naýryzda elimizde kalıanǵa aıyppul somasy ósetin boldy. 

Sonymen qatar polıtsııa qoǵamdyq oryndarda kalıan shekkenderdi jazaǵa tartyp jatqany týraly habarlaǵan edik. 

Buǵan deıin elimiz temeki kontrabandasy saldarynan jyl saıyn 32 mlrd teńge joǵaltatyny aıtyldy.