Vetnam Kommýnıstik partııasy Ortalyq komıtetiniń Bas hatshysy Ngýen Fý Chong qaıtys boldy

<p>ASTANA. KAZINFORM &ndash;&nbsp; Vetnam Kommýnıstik partııasynyń jetekshisi Ngýen Fý Trong 81 jasynda kóz jumdy. Bul týraly <a href="https://tass.ru/mezhdunarodnaya-panorama/21404127" target="_blank" rel="noopener">TASS</a> aqparat agenttigi partııa jetekshileri men Vetnam memleketiniń densaýlyǵyna qamqorlyq jasaýǵa jaýapty Ortalyq densaýlyq saqtaý basqarmasyna silteme jasap habarlady.&nbsp;</p>

Vedomstvonyń málimetinshe, Bas hatshy Hanoıdyń №108 áskerı gospıtalinde qaıtys bolǵan. 

Bir kún buryn Vetnam jańalyqtar agenttigi (VIA) Bas hatshyǵa emdelý qajet ekenin jazǵan bolatyn. Onda Vetnam Kommýnıstik partııasynyń Ortalyq komıteti el prezıdenti To Lamǵa Ngýen Fý Chongtyń qyzmetin ýaqytsha qosa atqarýdy tapsyrǵany habarlanǵan. Sondaı-aq mamandandyrylǵan medıtsınalyq mekemelerge professorlar, dárigerler, medıtsına qyzmetkerleri, jetekshi mamandar kontıngentin jumyldyrý jáne Bas hatshyny emdeý úshin barynsha qolaıly jaǵdaı jasaý, oǵan qajetti medıtsınalyq kómek kórsetý máselelerine basa nazar aýdarý tapsyryldy. 

Sol kúni Ngýen Fý Chongqa Vetnam Sotsıalıstik Respýblıkasynyń joǵary memlekettik nagradasy – Vetnam partııasy men halqynyń revolıýtsııalyq isindegi kórnekti qyzmetteri úshin beriletin «Altyn Juldyz» ordeni tapsyryldy. Marapattaý rásimi 108-shi aýrýhanada ótti. Oǵan KPV Ortalyq Komıtetiniń Saıası bıýrosy men hatshylyǵynyń barlyq múshesi, birqatar qyzmetker – bas hatshynyń kómekshileri, sondaı-aq Ngýen Fý Chongtyń otbasy músheleri qatysty. 

Aıta keteıik, Ngýen Fý Chong 1944 jyly 14 sáýirde Hanoı qalasynyń mańyndaǵy Don An qalasynda dúnıege kelgen. Hanoı memlekettik ýnıversıtetiniń fılologııa fakýltetin bitirip, fılologııa boıynsha kandıdattyq dıssertatsııasyn qorǵaǵan. 1981-1983 jyldar aralyǵynda saıasattaný ǵylymdarynyń doktory dárejesin ıelenip, professor atandy. Ol Máskeýdegi KOKP OK janyndaǵy Qoǵamdyq ǵylymdar akademııasynda orys tili men ádebıeti mamandyǵy boıynsha bilim alǵan. 

Ngýen Fý Trong 2011 jyly alǵash ret Ortalyq Komıtettiń Bas hatshysy bolyp saılanǵanǵa deıin 5 jyl boıy Vetnam Ulttyq Assambleıasyn (parlament) basqardy, al oǵan deıin ol eldiń partııalyq basshylyǵynda túrli qyzmetterdi, sonyń ishinde Hanoı partııasynyń hatshysy boldy. Ol KPV basshysy bolyp úsh ret (2011, 2016 jáne 2021 jyldary) saılanǵan. 

2018 jyldyń qazanynan 2021 jyldyń qańtaryna deıin Ngýen Fý Chong prezıdent Tran Daı Kýang qaıtys bolǵannan keıin el prezıdenti qyzmetin atqarǵan.