Veterınarlyq baqylaý jáne qadaǵalaý organdarynyń birqatar basshysy sógis aldy – AShM
Mınıstrlikte Veterınarlyq baqylaý jáne qadaǵalaý komıtetiniń 2019 jylǵy jáne 2020 jyldyń birinshi jartyjyldyǵyndaǵy jumys qorytyndysy boıynsha alqa otyrysy ótti.
Veterınarlyq baqylaý jáne qadaǵalaý komıtetiniń tóraǵasy Arman Óteǵulov eldegi veterınarlyq qaýipsizdik jáne epızootııalyq jaǵdaı týraly baıandady. Onyń aıtýynsha, byltyr 146 asa qaýipti aýrý tirkelse, osy jyldyń 6 aıynda 129 aýrý anyqtalǵan.
«Byltyr 17 asa qaýipti aýrýdyń aldyn alý maqsatynda janýarlar men qustarǵa 140 mln ekpe jasalǵan. Bıylǵy jyly 150 mln salynady dep josparlanǵan. Ótken jyly 32,5 mıllıonǵa jýyq janýar tekserildi, Nátıjesinde 54,6 myń bastan brýtsellez anyqtaldy. 2020 jyldyń 6 aıynda 18,7 mln bastan 33 myń aýrý belgisi tabylǵan», delingen habarlamada.
Baıandama barysynda bas memlekettik veterınarlyq ınspektor ótken jyly memlekettik shekara boıymen 32 veterınarlyq baqylaý pýnkti ornalastyrylǵannan keıin taýarlardyń eksporttyq-ımporttyq qozǵalysy kezinde zań buzýshylyq azaıǵanyn atap ótti.
A.Óteǵulovtyń aıtýynsha, Qazaqstan naryǵyna kiretin sapasyz ónimder ımporty aıtarlyqtaı tómendegen.
Vedomstvo qyzmetkerleriniń basqa da jetistikteri bar. Atap aıtqanda, 2019 jyly Dúnıejúzilik janýarlardyń densaýlyǵyn saqtaý uıymy Qazaqstanǵa shoshqanyń afrıkalyq obasy men joǵary patogendi qus tumaýynan azat el ataǵyn berdi. 2020 jyly klassıkalyq shoshqa obasynan bosatylǵan el mártebesin aldyq. Osy ýaqyt aralyǵynda 3 myńǵa jýyq qazaqstandyq aýylsharýashylyq taýar óndirýshileri ónimderin eksporttaýǵa arnalǵan sheteldik tizimge engizildi. Máselen, 9 qazaqstandyq kompanııa QHR-ǵa sıyr eti men qoı etin eksporttaýǵa quqyly kásiporyndar qataryna kirdi.
Sondaı-aq, veterınarlyq baqylaý jáne qadaǵalaý komıteti qazaqstandyq shoshqa etin, sút ónimderi men jún shıkizatyn Qytaıǵa eksporttaý týraly hattamalarǵa qol qoıdy. Jylqynyń etin Japonııaǵa eksporttaýǵa veterınarlyq sertıfıkat kelisildi, Eýropalyq Odaqpen bal jáne sút ónimderin eksporttaýǵa qoıylatyn talaptardy kelisý boıynsha kelissózder aıaqtalýda.
Alqa otyrysynda komıtet pen aýmaqtyq bólimsheler jumysyndaǵy birqatar zań buzýshylyqtar qarastyrylyp, sebepteri taldandy jáne olardy sheshý joldary talqylandy.
«Statıstıkalyq esepterde jáne «Aýylsharýashylyq janýarlaryn birdeılendirý» málimetterinde kórsetilgen mal sany týraly aqparattardy salystyrý barysynda kemshilikter anyqtaldy. Birinshi jartyjyldyqtyń qorytyndysy boıynsha aıyrmashylyq 11,7% qurady. Budan ózge, aýylsharýashylyq janýarlarynyń monıtorıngisi dıagnostıkalyq zertteýlerindegi 3 mıllıonǵa jýyq tekseriste qatelik bar. Sondaı-aq, komıtet bıotermaldy shuńqyrlardyń tizilimin júrgizbeıtini anyqtaldy: aqparattyq júıege mal qorymdary men sibir jarasynan ólgen janýarlardy kómýdiń tek 70% -y ǵana engizilgen», delingen habarlamada.
Jyl basynan bergi kameralyq taldaý nátıjeleri boıynsha myńnan astam memlekettik qyzmet kórsetý merzimin keshiktirý faktisi tirkelgen.
«Veterınarııalyq-sanıtarlyq baqylaýdyń durys júrgizilmegeni úshin Soltústik Qazaqstan oblystyq aýmaqtyq ınspektsııasynyń basshysy Marat Ibraevqa qatań sógis berildi, Aqtóbe, Jambyl jáne Pavlodar oblystyq aýmaqtyq ınspektsııalarynyń basshylary Temirbek Nurtazın, Jandar Qoekeev, Rashıd Nurbekov jáne Atyraý men Túrkistan oblystyq aýmaqtyq ınspektsııalary basshysynyń mindetin atqarýshy Ǵalymbek Bısenǵalıev pen Nurjan Úsenbaevqa sógis jarııalandy. Qaraǵandy oblystyq aýmaqtyq ınspektsııasynyń basshysy Marat Muhtarovqa eskertý túrindegi ákimshilik jaza berildi. Mańǵystaý oblystyq Veterınarlyq baqylaý jáne qadaǵalaý komıtetiniń aýmaqtyq ınspektsııasynyń bastyǵy Qýanyshkereı Myrzatovty qyzmetinen bosatý týraly sheshim qabyldandy», delingen habarlamada.
Komıtettiń habarlaýynsha, Qostanaı, Shyǵys Qazaqstan, Batys Qazaqstan, Almaty oblystyq ınspektsııalarynyń basshylaryna, sondaı-aq Shymkenttegi ınspektsııa basshylaryna qatysty qyzmettik tergeý júrgizilip jatyr.