Veterınarlarǵa planshetter beriledi - Baǵdat Mýsın

NUR-SULTAN. QazAqparat – Fermerlerdiń shyǵyndaryn azaıtýǵa múmkindik beretin júıe iske qosyldy. Bul týraly Úkimet otyrysynda tehnologııalyq serpilis ulttyq jobasyn talqylaý kezinde Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Aýyl sharýashylyǵy salasyna toqtalsaq, 1 shildeden bastap sýbsıdııalaýdyń júıesi iske qosyldy. Munda fermerlerge qajetti memlekettik qoldaý jónindegi barlyq aqparat jınalǵan. Bul fermerlerge shyǵyndardy 30 paıyzǵa qysqartýǵa, jalpy qujattarmen áýre-sarsańdy qysqartýǵa múmkindik beredi. «Aýyl sharýashylyǵy janýarlaryn sáıkestendirýdiń mobıldik qosymshasy» quryldy», - dedi B. Mýsın.

Onyń aıtýynsha, jol polıtsııasy qyzmetkerlerine berilgendeı, veterınar qyzmetkerlerge de planshetter beriletin bolady.

«Shalǵaı aýdandardaǵy fermerlerdiń júıede tipti ınternetsiz de jumys isteýine múmkindik jasaımyz», - dedi mınıstr.

Budan buryn habarlanǵandaı, Baǵdat Mýsın memlekettik qyzmetshilerge planshetter taratylyp jatqanyn aıtty.