Veterınarlardyń ortasha jasy - 60: Óńirlerde jas mamandar qaıda

<p>Senat tóraǵasynyń orynbasary Jaqyp Asanov agrarlyq ýnıversıtetti bitirgen mamandarǵa qatysty pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Aýyl sharýashylyǵynyń damýy tek ǵylymǵa ǵana baılanysty emes, ıaǵnı kadrlarǵa da táýeldi. Statıstıkaǵa súıensek, agrarlyq ýnıversıtetterdi bitirgenderdiń 80 paıyzy mamandyǵy boıynsha jumysqa turǵan. Osy shyn bolsa, onda nege aýyldyq jerde agronomdar, zootehnıkter, tehnologtar jetpeıdi? Al, veterınarlardyń ortasha jasy 60 eken. Sonda óńirlerge baryp jatqan mamandar qaıda?», — dedi J. Asanov Senatta agrarlyq ǵylymdy damytý taqyrybynda ótip jatqan Úkimet saǵatynda. 

Onyń sózine qaraǵanda, jyl saıyn 192 arnaýly kolledjdi 7,5 myń maman bitirip shyǵady.

«Biraq nege mehanızator, malshy, baý-baqsha mamandary, tehnıkter aýylda tapshy? Búgingi Úkimet saǵatyna memlekettik organdarmen birge oqý oryndarynyń, ǵylym salasynyń, kásiporyndardyń, qoǵamdyq uıymdardyń ókilderin shaqyryp, jan-jaqty pikir almassaq degen nıetimiz bar. Zań shyǵarýshy bılik retinde qaı jaǵynan biz úles qosa alamyz? Qandaı zańdardy qabyldaı alamyz? Osy máseleler tóńireginde naqty áńgime júrgizsek. Sonyń qorytyndysymen keleshekte jasaıtyn qadamdarymyzdy belgilep alamyn», — dedi Senat tóraǵasynyń orynbasary.

Jaqyp Asanov sondaı-aq agrarlyq ǵylymı jetistikter tek qaǵaz júzinde qalyp, óndiriske engizilmeı jatqanyn synǵa alǵan edi.