Veterınar: Janýarlar týraly zań evtanazııa sharasyn halyqaralyq ádistemege sáıkestendiredi
«Bul zańǵa qol qoıylmaı turǵan kezde Pralament Májilisiniń janyndaǵy jumys tobynyń múshesi boldym. Sondaǵy 48 adamnyń ishinde maman retinde osy iske atsalystym. Naqty óz salama kelsek, veterınarııa zańymen baılanysty siltemeler boldy. Onyń biri – evtanazııaǵa qatysty sharalar. Qarapaıym tilmen aıtsaq, «uıyqtatý» ǵoı. Buryn veterınarııa zańynda evtanazııa degen túsinik bolmaǵan. Tek ónim alatyn aýyl sharýashylyǵy janýarlaryn «soıý» túsinigi ǵana bolǵan. Al jabaıy janýarlar ońalmastaı jaraqat alsa nemese qutyryq sııaqty aınalaǵa qaýipti aýrýǵa shaldyqsa, olardy «uıyqtatý» máselesi zańmen naqty rettelmegen edi. Zańdaǵy evtanazııa degen uǵym osy máseleniń bárine zańdy retteýge jol ashyp otyr. Bul veterınarlardyń jumysyn ońaılatpasa, qıyndatpaıdy. Óıtkeni naqty reglament bolǵandyqtan, aq pen qarany ajyratý ońaılanady», - deıdi maman.
Onyń aıtýynsha, zańnamanyń bul baǵyttaǵy normalaryn ýaqyt óte kele qaıta jetildirý kerek bolady.
«Bas keńsesi London qalasynda ornalasqan Halyqaralyq janýarlardy qorǵaý qoǵamy bar. Sol uıymnyń janýarlar evtanazııasy boıynsha eki deńgeıdegi ádistemesi bar. Biri – «usynylatyn» ádisteme, ekinshisi – «shartty jol beriletin» ádisteme. Biz sonyń shartty ádistemesin alyp otyrmyz. «Usynylatyn» ádistemege ótýge áli erte. Óıtkeni quramynda esirtki elementteri bar preparat arqyly «uıyqtatý» usynylǵan. Al bizdiń veterınarııa salasy ondaı zattarmen jumys isteýge daıyn emes. Basqa da adam faktoryna baılanysty táýekelderi bar. Kez kelgen zań kúshine engennen keıin 2-3 jyldyń ishinde onyń naqty realıge qanshalyqty sáıkesetini belgili boldy. Sondyqtan búgin zańǵa engen normalar qatyp qalǵan qaǵıda deýge kelmeıdi. Ýaqyt synaǵy da túzetý engizetin shyǵar», - dedi Marhabat Madııarov.