Vengrııa Astanadaǵy Túrki akademııasyna baqylaýshy mártebesin aldy

ASTANA. QazAqparat - BUU Bas Assambleıasynyń 72-shi sessııasy sheńberinde ótken Túrkitildes memleketterdiń yntymaqtastyq keńesine (TMYK, Túrki keńesi) múshe elderdiń Syrtqy ister mınıstrleriniń beıresmı kezdesýinde Vengrııa Astanadaǵy Túrki akademııasy halyqaralyq uıymyna (TWESCO) baqylaýshy mártebesin aldy. Kezdesýge qatysýshylar Vengrııa ótinimin biraýyzdan maquldandy.

QR Syrtqy ister mınıstrliginiń aqparatyna sáıkes, kezdesýde negizinen Túrki keńesiniń búgingi qyzmeti men keleshegine qatysty máseleler talqylandy.

2015 jyldyń 11 qyrkúıeginde Astanada ótken TMYK Sammıtinde qabyldanǵan sheshimderdiń oryndalý barysy men Qyrǵyzstanda ótýi tıis kelesi Sammıtke daıyndyq sharalary da kún tártibindegi negizgi máselelerdiń biri boldy.

Mınıstrler sondaı-aq, Túrki Keńesi men BUU jáne onyń arnaıy uıymdary arasyndaǵy yntymaqtastyqty keńeıtý sharalaryn talqylady.

Budan bólek, alqaly jıynda Túrki keńesiniń qazirgi Bas hatshysy Ramıl Gasanovtyń ókilettik merziminiń aıaqtalýyna baılanysty kelesi Bas hatshy Qazaqstan tarapynan saılanatyny belgili boldy. Qatysýshylar jańa basshynyń qashan jáne qaı merzimge taǵaıyndalatyny qosymsha habarlanatynyn jetkizdi.

Buǵan deıin habarlaǵanymyzdaı, aǵymdaǵy jyldyń mamyr aıynda Vengrııanyń Syrtqy saýda jáne Syrtqy ister mınıstri Peter Sıııarto Majarstannyń Halyqaralyq Túrki akademııasyna tolyq quqyly baqylaýshy mártebesin alý jóninderesmı ótinim bergen bolatyn.