Velosport: Tokıo Olımpıadasynda el namysyn kimder qorǵaıdy

NUR-SULTAN. QazAqparat - Velosporttan Qazaqstan komandasynyń bas bapkeri Asan Bazaev Tokıo Olımpıadasynda el namysyn kimderdiń qorǵaıtyny týraly aıtty, dep habarlaıdy QazAqparat tilshisi.

Halyqaralyq velosport federatsııasynyń qorytyndy reıtıngi boıynsha, Qazaqstan komandasy tas joldaǵy velojarystan úsh lıtsenzııa, trektegi velosporttan eki joldama jeńip alǵan bolatyn.

Atap aıtar bolsaq, tas joldaǵy velojarysta el namysyn Alekseı Lýtsenko, Dmıtrıı Grýzdev jáne Vadım Pronskıı qorǵasa, trektegi velosporttan Artem Zaharov pen Sergeı Ponomarev synǵa túsedi.

Tas joldaǵy velojarysta Qazaqstan komandasynyń kapıtany mindetin Alekseı Lýtsenko atqarady. Dmıtrıı Grýzdev pen Vadım Pronskıı de el namysyn qorǵaıdy

Aıta keteıik, upaı jınaý kezeńderi 2018 jyldyń 22 qazany men 2019 jyldyń 22 qazany aralyǵyn qamtydy. Qorytyndy esepte bizdiń komanda 3259,35 upaımen 19-shy orynǵa taban tiredi. Bul rette 2019 jyly Qazaqstan qorjynyn mańyzdy upaılarmen toltyrǵan Alekseı Lýtsenkonyń eńbegi erekshe ekenin atap ótý kerek.

Sondaı-aq, qazaqstandyq veloshabandozdar Azııa birinshiliginde úsh altyn alyp, komanda reıtıngine 555 upaı qosty. Osylaısha, 2004 jyldan beri alǵash ret toptyq synda Qazaqstan atynan úsh sportshy baq synaıdy.

Olımpıada oıyndarynda erler arasyndaǵy báseke 24 shilde kúni toptyq jaryspen bastalady. Jarysqa 130 sportshy qatyspaq. Al jekeleı synda Alekseı Lýtsenko baq synaıdy.

Tokıo Olımpıadasynda trektegi velosport dodasy 1 tamyzda bastalady.