Veloshabandozdardyń jaqsy nátıje kórsetýge múmkindigi bar – mınıstr
Federatsııa ókilderi sportshylardyń nátıjeleri týraly aıtyp, tórtjyldyqtyń basty dodasyna daıyndyq josparyna toqtaldy.
2023 jylǵy Azııa oıyndarynda veloshosseden Qazaqstan quramasy jaqsy nátıje kórsetip, 2 altyn jáne 1 kúmis júldege ıe boldy. Al áıelder básekesinde jerlesterimizdiń enshisinde bir qola medal bar. Velotrek pen maýntınbaık (taý velosıpedi) jarysynda, ókinishke qaraı, Qazaqstan sportshylary júldegerler qatarynan kórine almady.
«Otandyq velosportta jeńispen órilgen jaqsy dástúrimiz bar. Ulttyq qurama sportshylary bıyldyń ózinde joǵary nátıjege qol jetkizdi. Alekseı Lýtsenko men Evgenıı Fedorovtyń maýsym boıy sátti óner kórsetýiniń arqasynda jerlesterimiz Olımpıadanyń 3 joldamasyna qol jetkizdi. Veloshabandozdardyń Hanchjoýdaǵy joǵary jetistigi Olımpıada oıyndarynda júldeli oryndardan úmitti ekenimizdi aıǵaqtaıdy. Velosport – medal qajet etetin sport túri. Al velotrek pen maýntınbaık sııaqty basqa da baǵdarlamalar boıynsha jattyǵý josparyn qaıta qaraý kerek. Ulttyq quramanyń kóshbasshylary jeke daıyndyq josparyn qatań ustanýǵa tıis», - dep atap ótti Ermek Marjyqpaev.
Velosport boıynsha olımpıadalyq irikteý saıystary aıaqtalyp, Qazaqstan ulttyq quramasynyń sportshylary Parıj Olımpıadasyna daıyndyq jumystaryn bastady. Týrızm jáne sport mınıstrligi Olımpıadaǵa deıin sportshylardyń oqý-jattyǵý jıynyn uıymdastyrýǵa, farmakologııalyq jáne veloshabandozdardy qalpyna keltirý quraldary boıynsha barlyq qajetti jaǵdaıdy jasaýǵa kómektesedi.
Jıyn sońynda mınıstr ótken jarystardyń, atap aıtqanda velotrek pen maýntıbaıktyń nátıjelerine tereń taldaý júrgizýdi, sondaı-aq Parıj Olımpıadasy aldynda komanda ishinde aýyzbirshilikti jáne jaqsy kóńil-kúıdi saqtaý jóninde sharalar qabyldaýdy tapsyrdy.