Vedomstvoaralyq tergeý: Jappaı tártipsizdik jáne lańkestik aktileri boıynsha 181 qylmystyq is bar

NUR-SULTAN. QazAqparat – Jappaı tártipsizdik jáne lańkestik aktileri boıynsha 181 qylmystyq is tergelip jatyr. Bul týraly Ortalyq kommýnıkatsııalar qyzmetinde QR Bas prokýratýrasy 1-qyzmet bastyǵynyń orynbasary Eldos Qılymjanov aıtty, dep habarlaıdy QazAqparat tilshisi.

«Bas prkýratýra qańtar oqıǵalary kezeńinde jasalǵan qylmystardyń tergelýin jáne azamattardyń konstıtýtsııalyq quqyqtaryn qorǵaý jumystaryn jalǵastyrýda. Barlyǵy 3 096 sotqa deıingi tergep-tekserýler tirkeldi. Negizinde olar menshikke qarsy, buzaqylyq jáne qarýdy jymqyrý qylmystary. Arnaıy prokýrorlardyń basqarýymen vedomstvoaralyq tergeý toby jappaı tártipsizdik jáne lańkestik aktileri boıynsha 181 qylmystyq isti tergep jatyr», - dedi E. Qılymjanov.

Onyń aıtýynsha, qylmystyq kodeks boıynsha jappaı tártipsizdikter azamattarǵa kúsh qoldanýmen, bıznes nysandaryn jáne jeke múlikti qıratýmen, bılik ókiline qarýly qarsylyq kórsetýge ulasady.

«Alaıda jekelegen adamdardyń áreketi halyq arasynda úreı men qoqynyshty týǵyzýdy jáne memlekettik organdardyń qyzmetin toqtatýdy maqsat etti. Sol úshin olar memlekettik bıliktiń sımvoly retinde ákimdik ǵımarattaryna, sondaı-aq tártip kúshteri nysandaryna shabýyl jasap, oǵan tosqaýyl qoıdy. Sondyqtan osyndaı is-áreketter Qylmystyq kodekstiń 255-babyna sáıkes, terrorızm aktileri retinde saralanady», - dedi Eldos Qılymjanov.

Quqyq qorǵaý organdarynyń ǵımaratyn basyp alýdyń negizgi maqsaty – atys qarýyn ıemdený. Atap aıtqanda, Almaty oblysynda polıtsııa departamenti ǵımaratynan 53 avtomat, 367 tapansha, 1 granatamet, sondaı-aq 23 myńnan astam patron urlanǵan, - dedi ol.