Vasılıı Levıt Tokıo Olımpıadasyna barady

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde 91 keli salmaqta Vasılıı Levıt Tokıo Olımpıadasynyń joldamasyn jeńip aldy, dep habarlaıdy QazAqparat tilshisi.

Rıo Olımpıadasynyń kúmis júldegeri, álem chempıonatynyń (2017, 2019) eki dúrkin qola júldegeri jáne 2009, 2015, 2017 jyldary Azııanyń úsh dúrkin chempıony atanǵan Levıt qazaq boksshylary arasynan úshinshi bolyp Tokıo Olımpıadasyna joldama utyp aldy.

Alǵashqy aıqasyn shırek fınaldan bastaǵan jerlesimiz Tájikstan sportshysy Davlat Boltaevpen judyryqtasyp, qarsylasyn aıqyn basymdyqpen utyp jartylaı fınalǵa shyqty. Bul salmaqta tek jartylaı fınalǵa shyqqan boksshylar ǵana Olımpıada oıyndaryna joldama alady. Qostanaılyq halyqaralyq dárejedegi boksshy óz mindetin abyroımen atqaryp, qazaq boksshylary arasynda úshinshi bolyp Olımpıadaǵa lıtsenzııasyn jeńip aldy.

Esterińizge sala keteıik, osyǵan osyǵan deıin 69 keli salmaqta Abylaıhan Júsipov jáne 81 keli salmaqta Bekzat Nurdáýletov Tokıo Olımpıadasyna joldama utyp aldy.

Jalpy, bul Amman qalasynda ótip jatqan Olımpıadalyq irikteý týrnırine bas bapker Ǵalymbek Kenjebaev 8 boksshyǵa úmit artyp alyp kelgen bolatyn.

Dál qazirgi esep boıynsha 8 boksshynyń jeteýi sharshy alańǵa shyǵyp, barlyǵy jarysty jeńispen aıaqtap keledi. Onyń úsheýi Olımpıadaǵa joldama jeńip aldy. Endi, tek asa aýyr salmaqtaǵy Qamshybek Qońqabaev qana sharshy alańǵa shyqqan joq. Qońqabaev búgin keshki sessııada Nursultan ýaqytymen 21:00-den keıin qytaılyq boksshymen judyryqtasady.

Buǵan deıin qazaq sportshylary jalpy Olımpada oıyndaryna 29 joldama jeńip alǵany týraly jazǵanbyz.