Vasılıı Levıt bokstan irikteý týrnıriniń fınalyna shyqty

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde Vasılıı Levıt jergilikti boksshyny utyp, fınalǵa joldama aldy, dep habarlaıdy QazAqparat tilshisi.

Levıt - erler arasynda 91 keli salmaqta el namysyn abyroımen qorǵap júrgen boksshylarymyzdyń biri. Ol búgin olımpıadalyq irikteý týrnıriniń jartylaı fınalynda sharshy alań qojaıyny Hýseın Ishaıshpen judyryqtasyp, asa tartysty jekpe-jek qorytyndysy boıynsha tóreshilerdiń sheshimimen jeńiske jetti.

Bul - Ǵalymbek Kenjebaev baptaıtyn boksshylar arasynan olımpıadalyq irikteý týrnıriniń fınalyna shyqqan ekinshi boksshy.

Esterińizge sala keteıik, osyǵan deıin Zakır Safıýllınniń qazaq boksshylary arasynda birinshi bolyp olımpıadalyq irikteý týrnıriniń fınalyna shyqqanyn jazǵan bolatynbyz. Sondaı-aq, Abylaıhan Júsipov atalǵan týrnırdiń jartylaı fınalynda utylyp, qola medaldi qanaǵat tutty.

Osymen kúndizgi sessııada qazaq boksshylary jarysty aıaqtady. Endi keshki sessııada 5 boksshymyz sharshy alańǵa shyǵady.

Keshki sessııa Nur-Sultan ýaqytymen saǵat 21:00-de bastalady.

Keshki sessııada myna boksshylar synǵa túsedi:

Áıelder

75 keli Nadejda Rıabets (Qazaqstan) - Keıtlın Parker (Avstralııa)

Erler

57 keli Serik Temirjanov (Qazaqstan) - Mırazızbek Mırzahalılov (Ózbekstan)

75 keli Ábilhan Amanqul (Qazaqstan) - Tańathan Toqtarbek (Qytaı)

81 keli Bekzat Nurdáýletov (Qazaqstan) - Odaı Alhındavı (Iordanııa)

+91 keli Qamshybek Qońqabaev (Qazaqstan) - Hýnı Ádilet (Avstralııa).