Vashıngtonda «Jańa Qazaqstan» qurý bastamasy talqylandy

NUR-SULTAN. QazAqparat – AQSh-tyń jetekshi analıtıkalyq ortalyqtarynyń biri «Atlantıkalyq keńes» alańynda «Qazaqstandyq-amerıkalyq qarym-qatynastarǵa otyz jyl: qańtar daǵdarysy jáne bolashaqqa jol» taqyrybynda paneldik pikirtalas ótti, dep habarlaıdy QR SІM baspasóz qyzmeti.

Halyqaralyq salyq jáne ınvestıtsııa ortalyǵynyń Prezıdenti Denıel Vıt óz alǵysózinde ekijaqty yntymaqtastyqtyń negizgi jetistikteri men Qazaqstannyń ǵalamdyq turaqtylyq pen qaýipsizdikti qamtamasyz etýge qosqan eleýli úlesin atap ótti.

Qazaqstannyń AQSh-taǵy Elshisi Erjan Ashyqbaev qańtar oqıǵalarynyń túpki sebepterin joıý boıynsha Úkimetiniń qabyldap jatqan sharalary týraly baıandap, tergeýdiń ashyq negizde ulttyq zańnama men elimizdiń halyqaralyq mindettemelerine sáıkes júrgiziletinine sendirdi.

Prezıdent Qasym-Jomart Toqaevtyń «Jańa Qazaqstandy» qurýǵa baǵyttalǵan reformalary men bastamalary, sondaı-aq halyqtyń ál-aýqatyn arttyrýǵa baǵyttalǵan Úkimet qyzmetiniń basymdyqtaryna basty nazar aýdaryldy. Bul turǵyda, Elshi Memleket basshysynyń saıası reformalar men demokratııalyq ózgeristerdi odan ári júzege asyrý baǵytyna beıildiligin rastady.

Óz kezeginde, Atlantıkalyq keńestiń Eýrazııa ortalyǵynyń Aǵa dırektory Djon Herbst Qazaqstannyń Ortalyq Azııadaǵy turaqtandyrýshy jáne teńgerýshi rólin, sondaı-aq óziniń tıimdiligin dáleldegen kópvektorly syrtqy saıasatynyń sátti júzege asyrylýyn atap ótti.

«New Lines Institute» oı-talqy ortalyǵynyń dırektory Kamran Boharı qańtardaǵy oqıǵa Qazaqstannyń damý traektorııasyna áser etpegenin atap ótti. Onyń pikirinshe, memleketti ózgertý jáne ekonomıkalyq damýdy jedeldetý belgili bir kúsh-jigerdi qajet etedi jáne memleket basshylyǵy oń baǵytta kele jatyr.

Atlantıkalyq keńestiń Aǵa ǵylymı qyzmetkeri Arıel Koen AQSh-tyń sanktsııalyq saıasatynyń teris áseriniń aldyn alýdyń mańyzdylyǵyn atap ótip, elimiz Kaspıı qubyr konsortsıýmy arqyly álemdik munaı jetkiziliminiń 1,2% qamtamasyz etetinine nazar aýdardy.

Jalpy, is-sharaǵa qatysýshylar Qazaqstandaǵy saıası jáne ekonomıkalyq reformalarǵa oń baǵa berip, olardyń ózektiligi men uzaq merzimdi tıimdiligine senim bildirdi. Sarapshylar Qazaqstannyń aýqymdy Eýrazııa aımaǵyndaǵy turaqtandyrýshy rólin jáne ekijaqty yntymaqtastyqty tereńdetý úshin eleýli áleýettiń bolýyn eskere otyryp, AQSh pen Qazaqstan arasyndaǵy keńeıtilgen strategııalyq áriptestikti odan ári damytýdyń mańyzdylyǵyn atap ótti.