Vashıngtonda postkeńestik elderdegi memlekettik qyzmet salasyndaǵy reformalar talqylandy

VAShINGTON. QazAqparat - Vashıngtonda Memlekettik basqarý salasyndaǵy amerıkalyq qoǵamnyń (ASPA) jyl saıynǵy konferentsııasy boldy. Onyń aıasynda Astana memlekettik qyzmet haby «Postkeńestik jáne ótpeli kezeńdegi elderdiń memlekettik qyzmetindegi zamanaýı trendter men syn-tegeýrinder» atty paneldik sessııa ótkizdi, dep habarlaıdy QazAqparat.

Qazaqstannyń AQSh-taǵy Tótenshe jáne Ókiletti Elshisi Erjan Qazyhanov paneldik sessııany asha otyryp, táýelsizdik alǵannan beri aımaqtaǵy elder memlekettik qyzmetti reformalaýda ózindik jol qalyptastyrǵanyn atap ótti. Elshi sonymen qatar, Qazaqstan memlekettik basqarýdy jetildirýdi zań ústemdigi men bilim ekonomıkasymen qatar 2050 jylǵa qaraı álemniń eń damyǵan 30 eldiń qataryna kirýdiń negizgi quraly retinde qarastyratyndyǵyn aıtty.

Memlekettik basqarý salasyndaǵy amerıkalyq qoǵamnyń Atqarýshy dırektory Ýılıam Shılds 40-tan astam el qatysatyn Astana memlekettik qyzmet habymen áriptestiktiń mańyzdylyǵyna toqtaldy. Ásirese memlekettik basqarý salasyndaǵy ǵylymı jarııalanymdar ázirleý jáne basyp shyǵarýdaǵy Habpen birlesken tabysty jumysqa nazar aýdardy. Sondaı-aq, Shılds «ártúrli elderdiń sarapshylary arasynda memlekettik basqarý boıynsha netvorkıng pen bilim almasýdyń dástúrli platformasyna» aınalǵan Habtyń jumysyn joǵary baǵalady. Ol Habtyń jyl saıynǵy konferentsııasyna ASPA ókilderiniń qatysýǵa nıeti baryn bildirdi.

Sessııa barysynda Aýǵanstan, Belarýs, Qazaqstan, Qyrǵyz Respýblıkasy, Moldova, Soltústik Makedonııa, AQSh jáne Ýkraınanyń ýákiletti organdarynyń basshylary men sarapshylary óz elderindegi memlekettik qyzmetti damytýdaǵy biregeı tájirıbelerimen bólisip, osy saladaǵy ortaq máselelerdi talqylady.

Máselen, Koreıa Respýblıkasy Personaldy basqarýdyń eks-mınıstri, professor Pan Sýk Kım aımaqtaǵy memlekettik qyzmetti reformalaýdaǵy basymdyqtardyń biri retinde kadr qyzmetin kásibılendirý ekenin jetkizdi. «Aımaq elderi úzdik kandıdattardy irikteý men olardy merıtokratııa qaǵıdattaryna sáıkes mansaptyq ósýin jetildirý qajet. Biz óz tájirıbemizben bólisýge ázirmiz», - dedi ol.

Sessııaǵa qatysýshylar Astana memlekettik qyzmet habynyń biregeıligi men mańyzdylyǵyn atap ótti. Atap aıtqanda, memlekettik basqarý salasyndaǵy tanymal sarapshylar - Federaldy memlekettik qyzmet ınstıtýtynyń burynǵy dırektory Chester Nıýland, AQSh-tyń jalaqy boıynsha Federaldyq keńestiń burynǵy tóraǵasy Stıven Kondrı, Governance Solutions International (AQSh) atqarýshy dırektory Gıdo Bertýchchı tájirıbe almasýda jáne ókiletti organdar, memlekettik basqarý mektepteri men ártúrli elder sarapshylary arasyndaǵy seriktestik qarym-atynastardy nyǵaıtýda hab qyzmetiniń ereksheligine toqtaldy.