«Vashıngton» turǵyn úı kesheni súrilmeıtin boldy - ákimdik

ASTANA. QazAqparat - Astana ákimdigi G-park merdiger kompanııasy zańsyz turǵyzyp jatqan, keıin sot úkimimen súrile bastaǵan «Dýblın» jáne «Vashıngton» turǵyn úı keshenderine qatysty aqparat taratty, dep habarlaıdy QazAqparat.

«Dýblın» turǵyn úı kesheniniń qurylysy ruqsat qujattarynsyz júrgizilgen. Sh.Aıtmatov pen J.Moldaǵalıev kósheleriniń qıylysyndaǵy jer aldyn ala anyqtalyp, jylý trassasynyń qurylysyna bólingen.

Osyǵan baılanysty bul ýchaskedegi qurylys jumystary toqtatyldy. Ornatylǵan qadalar demontajdalyp, ruqsat etilgen jerge aýystyrylady. Qurylys kompanııasymen shart jasaǵan azamattardyń múddeleri saqtalyp, árkim óz páterlerin alatyn bolady», - dep jazdy qalalyq ákimdikten.

Ondaǵy málimetke qaraǵanda, «Vashıngton» turǵyn úıi boıynsha qurylys kompanııasyna jiberilgen aqaýlardy joıyp, barlyq qajetti ruqsat qujattaryn resimdeý tapsyryldy.

Aıta keteıik, buǵan deıin aýyr tehnıka júrgizýshisi «Dýblın» turǵyn úı keshenin súrýge kedergi jasaǵanyn jazǵan bolatynbyz.

Sodan soń Astana qalalyq ádilet departamenti basshysynyń orynbasary Azamat Berdibekov elordada súriletin «Dýblın» jáne «Vashıngton» turǵyn úı keshenderine úlesker bolǵan azamattardyń aqshasyn kim qaıtaratynyn túsindirgen.