Vashıngton turǵyndary qazaqstandyq ártisterdiń shyǵarmashylyǵyn joǵary baǵalady

<p>Vashıngton turǵyndary Qazaqstan Respýblıkasynyń AQSh-taǵy Elshiligi men Roza Baǵlanova atyndaǵy &laquo;Qazaqkontsert&raquo; memlekettik kontsert uıymynyń bastamasymen, qazaqstandyq &laquo;Polymetal International&raquo; kompanııasynyń qoldaýymen uıymdastyrǵan &laquo;Turan&raquo; folklorlyq-etnografııalyq ansambliniń keremet kontsertin tamashalady. Mádenı shara barysynda sheteldikter Qazaqstannyń baı murasymen tanysýǵa múmkindik aldy, dep habarlaıdy <a href="Kazinform" target="_blank" rel="noopener">Kazinform </a>agenttiginiń menshikti tilshisi.</p>

Mýzykalyq merekede Qazaqstannyń tanymal jáne talantty ártisteri óner kórsetti.

«Turan» folklorlyq-etnografııalyq ansambli klassıkalyq jáne folklorlyq janrdy qamtıtyn «Bridge of Times» («Zaman kópiri») atty jańa baǵdarlamasynda qazaqtyń dástúrli halyq aspaptarynda ásem áýender oryndady.

Eýrazııa júregine mýzykalyq saıahat barysynda «Uly Turan – Máńgilik», «Shabyt», «Aqqý», «Orteke» (ıÝNESKO-nyń dúnıejúzilik materıaldyq emes mádenı mura tizimine engizilgen), «Aıttym sálem, Qalamqas», «Qazaq jeri», «Qara jorǵa», «Kóroǵly», «Er Turan» (Túrki áleminiń ánurany) shyǵarmalary oryndaldy.

Opera ánshileri Áıgerim Altynbek (soprano, bedeldi júldeler ıegeri, Italııadaǵy Arrıgo Boıto atyndaǵy memlekettik konservatorııanyń aspıranty), Rasýl Jarmaǵambetov (barıton, halyqaralyq baıqaýlardyń belgili laýreaty, Abaı atyndaǵy Qazaq ulttyq opera jáne balet teatrynyń solısi), ónerli kontsertmeıster Dına Mırmanova (talantty pıanıst, halyqaralyq baıqaýlardyń laýreaty) «Figaro Cavatina», «Ecco: Respiro Appena. Io Son L'umile Ancella», «THE DUO HANNA AND DANILO», «Bridge of Times», «Qypshaqtar ánurany» jáne taǵy basqa shyǵarmalardy kópshilik nazaryna usyndy.

Qazaqstan Respýblıkasynyń AQSh-taǵy Elshisi Erjan Ashyqbaev shara qonaqtaryn, dıplomatııalyq korpýs jáne qazaq dıasporasyn quttyqtap, bul kesh – Qazaqstan men AQSh-tyń, onyń ishinde mádenı almasý salasyndaǵy tabysty jáne nátıjeli yntymaqtastyǵyn aıǵaqtaıtynyn atap ótti.

Kontsertte kópshilik nazaryna qazaqtyń qonaqjaılylyǵy men dostyǵyn pash etetin klassıkalyq jáne halyqtyq mýzykanyń alýan túrli baǵdarlamasy usynyldy. Otandyq solıster jergilikti Vashıngton turǵyndarynyń Qazaqstan óneri men ulttyq mádenıetine úlken qyzyǵýshylyǵyn atap ótti.

Qazaq dıasporasynyń ókili Dana Domenovanyń baıandaýynsha, ol Qazaqstanda týǵan, biraq kópten beri AQSh-ta turyp jatyr. Otanymen baılanysty saqtap qalýǵa múmkindik beretin bul shara ol úshin óte mańyzdy. Dananyń aıtýynsha, Qazaqstan týraly maqalalar oqyp nemese derekti fılmder de kórýge bolady, biraq bul múldem basqa, qazaqtyń shynaıy mádenı murasyn tanytatyn kontsertke jeke qatysýy ózgeshe áser syılaıdy.

Amerıkanyń jergilikti turǵyny Skott Patnod buǵan deıin Qazaqstanǵa kelýge múmkindik alǵanyn aıtady. Skott Vashıngtonda turatyn qazaqtar men Qazaqstanda turyp, jumys istegen amerıkalyqtardyń arasynda dostary kóp ekenin atap ótti.

«Men Qazaqstandy jaqsy kóremin – bul keremet el. Onyń dástúrli jáne klassıkalyq mýzykasy júrekterdi jylytady», - dep moıyndady Skott.

Loren Strobl men Brıdjıd O'Donnell – «FLEX» («Future Leaders Exchange») joǵary synyp oqýshylaryna arnalǵan amerıkandyq bilim almasý baǵdarlamasy boıynsha Qazaqstanda (Almaty q.) bir oqý jylynda (2022-2023) bilim alǵan mektep oqýshylary. Lorenniń aıtýynsha, bul baǵdarlama eki el arasyndaǵy baılanysty nyǵaıtýǵa kómektesedi. Onyń Almatyda dostary kóp, jaqyn arada elimizge bir aıǵa kelýdi josparlap otyr.

"Qazaqstan – óte qonaqjaı el, munda ulttyq taǵamdar – et, baýyrsaq, palaý unady", - degen Loren tamasha kontsert, ádemi ulttyq kıimderdi, sondaı-aq qazaqtyń mýzykalyq aspaptary – dombyra men qobyzdyń tamasha únin atap ótti. Loren Qazaqstanda júrgende dombyra tartýdy úırengen.

Brıdjıd te bilim alý úshin Qazaqstandy tańdady, sebebi ol bizdiń elimizdi álemdegi eń qyzyqty elderdiń biri dep sanaıdy. Memleketimizdiń biregeıligi qazaqtyń ádemi mádenıetin týdyrǵan túrki jáne ıslam áleminiń, mońǵol jáne keńes dáýiriniń yqpalymen baılanysty. Brıdjıd óziniń úlken tájirıbe jınaqtaǵanyn jáne basqalarǵa bizdiń elge, sonyń ishinde oqýshylarmen almasý baǵdarlamasy arqyly kelýge keńes beretinin aıtty. Brıdjıt orys jáne qazaq tilderin oqýdy jalǵastyrý josparymen bólisip, bolashaqta halyqaralyq bızneste jumys istegisi, onyń ishinde elimizben jáne jalpy aımaqpen ekonomıkalyq qarym-qatynasty damytqysy keletinin jetkizdi.

Qazaqstandyq ártister AQSh-qa sapary aıasynda Arızona shtatynyń Fenıks qalasynda Qazaqstan men Arızona Ulttyq gvardııasy arasyndaǵy yntymaqtastyqqa 30 jyl tolýynyń qurmetine «Shtattar seriktestigi baǵdarlamasy» (State Partnership Program, SPP) aıasynda kontsert ótkizdi.