Vashıngton Kabýldan óz azamataryn evakýatsııalaýdy tezdetti

KABÝL. QazAqparat – AQSh prezıdenti óz azamattaryn Aýǵanstan astanasynan evakýatsııalaý jyldamdatylǵany týraly málimdep, sondaı-aq Aýǵanstandaǵy Islam memleketi tarapynan qater tónip turǵanyn eskertti, dep habarlaıdy QazAqparat VVS-ge silteme jasap.

Juma kúni Aq úıde ótken brıfıng kezinde AQSh prezıdenti Djo Baıden «Talıban» qozǵalysy óz baqylaýyna alǵan Aýǵanstannan amerıkandyq jáne aýǵan azamattaryn shyǵarýǵa ýáde berdi. Budan basqa, ol saqtalyp otyrǵan qaýip-qater, sonyń ishinde Horasan provıntsııasynda «IM» terrorıstik toby tarapynan shabýyl qaýpi bar ekenin eskertti.

Baıdenniń aıtýynsha, sońǵy aptada AQSh Kabýl áýejaıynan 28 myńǵa jýyq adamdy evakýatsııalady. Oǵan qaramastan, evakýatsııanyń 31 tamyzǵa belgilengen sońǵy merzimin uzartý talap etilýde.

Budan basqa, amerıkandyq áskerılerdiń Kabýl áýejaıynda qaýipsiz aımaq perımetrin keńeıtkeni atap ótilýde.

AUSh prezıdenti AQSh Memlekettik departamentine Aýǵanstanda qalyp qoıǵan amerıkandyqtarmen telefon, elektrondyq poshta jáne basqa joldar arqyly baılanysqa shyǵýyn tapsyrǵanyn jáne Vashıngtonnyń olardy áýejaıǵa ótkizý jospary bar ekenin atap ótti.

Osy arada, jeksenbide AQSh Qorǵanys mınıstrligi Aýǵanstanǵa kómek kórsetý úshin qorda turǵan azamattyq áýe flotyn jumyldyrylǵany týraly málimdedi. Bul baǵdarlamaǵa sáıkes, túrli amerıkandyq áýe jelileriniń 18 kommertsııalyq ushaǵy evakýatsııalanǵandardy Aýǵanstan syrtyndaǵy úshinshi elderdegi qaýipsiz jerge tasymaldaý úshin paıdalanylady. Bul baǵdarlama sońǵy ret 2003 jyly AQSh-tyń Irak eline basyp kirgen ýaqytynda jáne Parsy shyǵanaǵynda 1990-1991 jyldary bolǵan soǵys kezinde qoldanylǵan.